Breytingar hjá Intellecta

„Baldur Gísli kemur með víðtæka reynslu á sviði mannauðsmála og hefur unnið við margþætt verkefni tengd breytingastjórnun, ráðgjöf og sjálfbærni. Baldur starfaði áður sem mannauðsstjóri hjúkrunarheimila Sóltúns, þar sem hann leiddi breytingaferli fyrirtækisins, og sem mannauðsstjóri Landsbankans í 12 ár. Þar veitti hann stjórnendum ráðgjöf og leiddi sjálfbærniteymi bankans,“ segir í tilkynningu Intellecta.

Í tilkynningunni kemur jafnframt fram að Sigríður Svava Sandholt sé orðin meðeigandi hjá Intellecta „í kjölfar þriggja ára farsæls starfs þar sem hún hefur sérhæft sig í ráðningum stjórnenda og sérfræðinga.“

„Áður var hún framkvæmdastjóri Fræðslu ehf. og svo starfaði hún í tæpa tvo áratugi hjá Air Atlanta í fjölbreyttum stjórnunarhlutverkum. Með djúpa innsýn í mannauðsstjórnun og verkefnastjórnun hefur Sigríður sýnt framúrskarandi hæfni í að finna hæfasta fólkið fyrir íslensk fyrirtæki.

Hún er með B.Sc. gráðu í viðskiptafræði, diplómu í stjórnun og MPM í verkefnastjórnun, sem undirstrikar hennar sterka faglega bakgrunn.“

Fyrirtækið sé nú enn betur í stakk búið að mæta þörfum viðskiptavina sem margir muni strax njóta góðs af þessari viðbót, að sögn Einars Þórs Bjarnasonar, framkvæmdastjóra Intellecta.

„Við hjá Intellecta erum einstaklega ánægð með að fá Baldur til liðs við okkur og leiða mannauðsráðgjöf fyrirtækisins. Með hans víðtæku reynslu og djúpu innsýn í mannauðsmál getum við veitt viðskiptavinum okkar enn markvissari þjónustu og stuðning við uppbyggingu sterkrar vinnustaðamenningar. Jafnframt er það mikill heiður að bjóða Sigríði velkomna í hóp meðeigenda Intellecta. Hún hefur sýnt framúrskarandi hæfni í ráðningum stjórnenda og sérfræðinga og mun áfram leggja sitt af mörkum til að styrkja stöðu okkar sem leiðandi ráðningar- og ráðgjafarfyrirtæki á Íslandi. Við erum afar stolt af því að hafa jafn öflugan og reynslumikinn hóp í fararbroddi í starfsemi okkar.“

„Með þessari sýn og kraftmiklu teymi ætlar Intellecta að halda áfram að vera verðugur samstarfsaðili íslenskra fyrirtækja,“segir Einar.