Með stór­stjörnum í væntan­legri kvik­mynd Marvel

Þessu greinir Jóhannes Haukur frá í færslu á Instagram-síðu sinni en þar má sjá nafn hans við hliðina á nöfnum stórstjarna á veggspjaldi sem auglýsir myndina. Stórstjörnur á borð við Anthony Mackie, Giancarlo Esposito, Harrison Ford, Liv Tyler og Tim Blake Nelson fara með hlutverk í myndinni. 

„Maður fer bara næstum því hjá sér, ég vona bara að þeir klippi mig ekki úr myndinni,“ segir Jóhannes kíminn í samtali við Vísi en hann hefur ekki birst í neinni stiklu fyrir kvikmyndina og þar að auki er nafn hans ekki skráð við myndina á vefsíðunni Imdb. 

Hefur því ríkt þó nokkur leynd um þátttöku Jóhannesar í kvikmyndinni fram að þessu og segist hann ekki geta uppljóstrað hvaða persónu hann mun glæða lífi í kvikmyndinni en hann tekur fram að það sé ákveðin persóna úr myndasögunum fræknu úr smiðju Marvel.

Allt leyndarmál hjá þessu liði

„Það er auðvitað allt leyndarmál hjá þessu liði þar til þeir segja til. Einn sem kemur nýr inn í þetta reshoots er Giancarlo Esposito sem leikur Gus Fring í Breaking Bad. Ég er svolítið með honum, hann er karakter sem heitir Sidewinder. Það er partur af svona hóp sem heitir Serpent Society og það má nú kannski leiða líkum að því að ég sé einn af þeim, þó að það hafi hvergi komið fram annars staðar. Það er allavega hægt að reyna fylla inn í eyðurnar með hver ég er, þó það sé ekki komið fram.“

Jóhannes kom að ákveðnu leyti bakdyramegin inn í verkefnið en hann bættist við stóran hóp leikara í myndinni þegar að nokkrum atriðum var bætt við í sumar og önnur atriði voru tekin upp aftur (e. reshoots). Hann var ekki hluti af leikhópnum sem tók þátt í upprunalegu tökunum árið 2023.

„Ég fór reyndar um daginn, ég var í London, og var sendur í svona ADR, til að laga hljóð og þá sá ég nú smá bút og samkvæmt því þá hangi ég enn inni. Maður veit aldrei og sérstaklega með Marvel. Þeir eru þekktir fyrir að krukka vel og lengi í myndunum sínum svo að maður bara mætir á frumsýningu og vonar að maður sé þarna að einhverju leyti.“

Slysaðist inn á settið hjá Súpermann

Sama hvernig fari muni hann búa að reynslunni og minningum sem fylgja því að taka þátt í svo stóru verkefni. Ferlið hafi verið algjört ævintýri.

„Þetta var helvíti gaman. Þetta voru ljúfar nokkrar vikur þarna í Atlanta-borg í Georgíu að borða barbikjú og leika í Marvel-mynd. Mér var einu sinni ekið inn í vitlausa búningadeild. Ég átti að vera í mátun og mæti þarna inn og segi nafnið á karakternum en þær könnuðust ekkert við það, búningakonurnar. Þær sögðu mér að bíða aðeins og þá sá ég að það væri Súpermann-lógó hér og þar á veggnum og þá var í sama tökusvæði verið að taka upp Súpermann myndina.“

Spurður hvort hann hafi leikið á móti Anthony Mackie svarar hann því játandi.

„Þó ég sé þarna á pósternum þá myndi ég seint segja að ég sé að halda uppi einhverjum söguþræði.“