Vill einn af höfundum „Project 2025“ við stjórn fjárlagaskrifstofu

Eftir að Trump lét af embætti hefur Vought einkum einbeitt sér að smíði áðurnefnds Project 2025, en það er í raun áherslulisti og mögulegur leiðarvísir fyrir ríkisstjórn Trumps sem skrifaður var fyrir samtökin Heritage Foundation. Project 2025 hefur verið lýst sem óskalista öfgafullra, kristinna íhaldsmanna og vakti mikla athygli í aðdraganda forsetakosninganna.

Trump neitaði því ítrekað í nýafstaðinni kosningabaráttu sinni að hann tengdist Project 2025 á nokkurn þátt, þó að margir höfundar hins ítarlega óskalista hefðu verið embættismenn í ríkisstjórn hans og aðrir hefur komið að kosningabaráttu hans.

Vought skrifaði sérstaklega kafla í Project 2025 um endurbætur og breytingar á rekstri fjárlagaskrifstofunnar. Áður hefur Trump tilnefnt Tom Homan, sem svokallaðan „landamærakeisara“ og Brendan Carr í embætti formanns Fjarskiptastofnunnar Bandaríkjanna (FCC). Báðir komu að því að semja Project 2025.

Sjá einnig: Stefnir í slag við samfélagsmiðla og sjónvarpsstöðvar

Vought er talinn muna koma að vinnu auðjöfranna Elons Musk og Viveks Ramaswamy, sem hafa tekið að sér að vinna að umfangsmiklum niðurskurði í ríkisrekstri Bandaríkjanna, en vinna þeirra á að vera í samvinnu með fjárlagaskrifstofu forsetaembættisins.

Sjá einnig: Musk settur í niðurskurðinn og sjónvarpsmaður verður varnarmálaráðherra

Í tilkynningu um tilnefningu Vought segir Trump hann hafa staðið sig vel í hlutverki sínu þegar Trump var síðasta forseti og vel hafi gengið að fækka reglugerðum.

„Russ veit nákvæmlega hvernig á að brjóta upp djúpríkið og vopnvædd stjórnvöld og mun hjálpa við að færa fólkinu sjálfstjón á ný,“ skrifaði Trump.

„Myndarmaður“ í fjármálaráðuneytið

Næsta ríkisstjórn Trumps er óðum að taka á sig mynd eftir hverja umdeilda útnefninguna á fætur annarri. Greint var frá því seint í gær að hann hygðist tilnefna Scott Bessent, afkastamikinn fjárfesti sem talið er að verði öflugur málsvari fjármálaafla á Wall Street, í embætti fjármálaráðherra.

Bessent vann á árum áður fyrir George Soros, sem hægrihreyfingar víða um heim hafa lengi gert að sérstakri grýlu, en hefur þó lengi verið ötull stuðningsmaður Trumps, þó hann hafi ekkert tengst fyrstu ríkisstjórn Trumps, og er náinn bandamaður JD Vance, verðandi varaforseta.

Trump lýsti Bessent nýverið sem „einum skarpasta manni Wall Street“ og sagði hann virtan af öllum. Þá sagði Trump einnig að Bessent væri myndarmaður, samkvæmt Wall Street Journal.

Bessent hefur sagt að hann hafi ákveðið að stökkva á Trump-lestina, ef svo má segja, þegar hann sá að fréttir af dómsmálum Trumps virtust auka fylgi forsetans fyrrverandi en ekki koma niður á því. Þegar slíkt ætti við um fyrirtæki, væri réttast að fjárfesta í þeim og gerði hann það sama með Trump.

Í meiri samskiptum við þingmenn

Trump tilkynnti einnig í gærkvöldi að hann ætlaði að tilnefnda Lori Chavez-DeRemar sem atvinnumálaráðherra Bandaríkjanna og að Scott Turner, fyrrverandi fótboltamaður sem kom einnig að síðustu ríkisstjórn Trumps, yrði húsnæðismálaráðherra.

Undanfarna daga hefur Trump opinberað fjölmargar tilnefningar í ríkisstjórn sína. Hraðinn hefur verið mun meiri en áður og á tæpum þremur vikum hefur hann tilkynnt í næstum því allar stöður í ríkisstjórninni.

Ein af tilnefningum Trumps hefur ekki gengið eftir, enn sem komið er. Fyrrverandi þingmaðurinn Matt Gaetz helltist nýverið úr lestinni.

Sjá einnig: Pam Bondi kemur í stað Matt Gaetz

Repúblikanar í öldungadeild Bandaríkjaþings hafa samkvæmt frétt Washington Post tekið vel í fráhvarf Gaetz og er Trump og hans fólk sagt í nánar samskiptum við þingmenn um framhaldið á síðustu dögum.