Lögbrjótar ættu að fylgjast með á Ísland.is

Þetta kemur fram í tilkynningu frá ríkislögreglustjóra. Hingað til hafa ákærur ásamt skjalaskrám verið fluttar á pappír milli einstaklinga og stofnana. 

„Markmiðið með þessari vegferð er að hætta að flytja fólk og pappír og gera gögn frekar aðgengileg með rafrænum hætti þegar þeirra er þörf. Það leiðir til lægri málskostnaðar, styttri málsmeðferðartíma, minna kolefnisspors og aukins gagnsæis fyrir alla aðila máls,“ segir í tilkynningu.

Ákærur og birtingar vegna umferðarlagabrota birtist nú í pósthólfi einstaklinga á Ísland.is þar sem hægt verður að staðfesta móttöku á gögnunum. Í þeim tilfellum sem það tekst ekki hefur lögregla nú samhliða tekið upp snjallforrit til þess að birta einstaklingum ákærur í persónu.

Þá er unnið að því að færa allar ákærur yfir á rafrænt form auk allra birtinga, ekki aðeins vegna umferðarlagabrota.