Enginn stjórnmálamaður á loftslagsráðstefnu

Kjartan Kjartansson skrifar 4. nóvember 2024 09:17

Árleg loftslagsráðstefna Sameinuðu þjóðanna fer fram í Bakú í Aserbaídsjan í ár. Aserar eru umfamgsmiklir framleiðendur olíu og gass. Vísir/Getty

Í hátt í fimmtíu manna sendinefnd Íslands á loftslagsráðstefnu í Aserbaídsjan verður enginn kjörinn fulltrúi, hvorki ráðherra, þingmaður né sveitarstjórnarmaður. Ráðstefnunni lýkur átta dögum fyrir alþingiskosningar.

COP29-loftslagsráðstefnan fer fram í borginni Bakú við Kaspíahaf dagana 11. til 22. nóvember. Alls eru 46 skráðir á ráðstefnuna í gegnum aðgang Íslands samkvæmt skriflegu svari umhverfis-, orku- og loftslagsráðuneytisins við fyrirspurn Vísis.

Opinber sendinefnd Íslands er skipuð tíu manns. Helmingur þeirra kemur úr umhverfis-, orku- og loftslagsráðuneytinu, þar á meðal formaður hennar, Helga Barðadóttir. Þrír fulltrúar koma frá utanríkisráðuneytinu en auk þeirra verður sérfræðingur frá Umhverfisstofnun og fulltrúi Landssambands ungmennafélaga með í för.

Aðeins tveir fulltrúar frá umhverfisráðuneytinu sitja alla ráðstefnuna en aðrir verða þar skemur.

Fjórir fulltrúar frá opinberum aðilum og frjálsum félagasamtökum ferðast til Bakú, þar á meðal þrír frá umhverfissamtökunum Ungum umhverfissinnum og Landvernd. Tinna Hallgrímsdóttir, fulltrúi Seðlabanka Íslands, var áður forseti Ungra umhverfissinna.

Fjölmennasti hópurinn frá Íslandi á ráðstefnunni er tuttugu manna viðskiptasendinefnd. Hún er skipuð fulltrúum orkufyrirtækja, verkfræðistofa og kolefnisbindingarfyrirtækja.

Til viðbótar eru níu sjálfboðaliðar sem vinna í skála á vegun átaks um verndun freðhvolfs jarðar. Ísland fer með formennsku í því átaki ásamt Síle. Sjálfboðaliðarnar sem vinna í skálanum er ungt vísindafólk sem ráðuneytið segir ekki hafa greiðan aðgang að ráðstefnunni nema með skráningu í gegnum aðildarríki loftslagssamningsins. Skýrt sé að sjálfboðaliðarnir komi ekki fram í nafni Íslands.

Þá eru tvö sæti á ráðstefnunni tekin frá fyrir fulltrúa Atlantshafsbandalagsins að beiðni utanríkisráðuneytisins. Ekki kemur fram hverjir þeir verða í svari ráðuneytisins.

Að neðan má sjá nöfn þeirra sem mæta frá Íslandi á COP29:

Opinber sendinefnd: