Mark beint úr horni dugði ekki til

Bandaríkin og Ísland voru að mætast í annað sinn á fjórum dögum, en liðin mættust einnig síðastliðinn fimmtudag. Þá unnu Bandaríkin 3-1 sigur.

Lengi vel stefndi í að íslenska liðið myndi hefna fyrir tapið eftir að Karólína Lea Vilhjálmsdóttir kom Íslendingum yfir á 31. mínútu með marki beint úr hornspyrnu. Karólína tók þá hornspyrnu frá vinstri og snéri boltanum yfir Casey Murphy í bandaríska markinu.

Þetta reyndist eina mark fyrri hálfleiksins og staðan því 1-0, Íslandi í vil, þegar liðin gengu til búningsherbergja. Bandaríska liðið sótti stíft í síðari hálfleik og uppskar loks jöfnunarmark á 72. mínútu þegar Lynn Williams kom boltanum í netið.

Fjórum mínútum síðar tóku bandarísku stúlkurnar svo forystuna þegar Lindsey Horan skoraði gott mark áður en Emma Sears bætti þriðja markinu við í uppbótartíma. Niðurstaðan því 3-1 sigur Bandaríkjanna, en bandarísku stelpurnar eru nú taplausar í síðustu 17 leikjum sínum.