Stappfullt á eina stærstu menningarhátíð ársins

Dóra Júlía Agnarsdóttir skrifar 15. október 2024 18:01

Herdís Mjöll, Hrafnhildur Marta, Sólveig Steinþórsdóttir, Guðbjartur Hákonarson, Bjarni Frímann og Níels Thibaud voru með barokk á klúbbnum á State of the art. State of the art

Listahátíðin State of the Art fór fram í fyrsta sinn með pompi og prakt í síðustu viku. Á hátíðinni kenndi ýmissa grasa en þar komu fram Bríet, ADHD, Miguel Atwood-Ferguson, kammersveitin Elja og fleiri. Fjölbreyttir og óhefðbundnir viðburðir heilluðu mikinn fjölda fólks sem sótti hátíðina.

Hátíðin fór fram víðsvegar um höfuðborgarsvæðið, Ásmundarsalur opnaði dyrnar fyrir málstofu um raftónlist, næturklúbburinn AUTO hýsti Barokk á klúbbnum og Bjarni Frímann hélt píanótónleika á verkstæðinu Highland Trucks.

View this post on Instagram

A post shared by State of the Art (@state.of.the.art.festival)

Nýtt samhengi fyrir fjölbreytta tónlist

Í fréttatilkynningu segir að mæting á hátíðina hafi verið til fyrirmyndar og gleðin allsráðandi.

„Eftir frábærar viðtökur fyrstu hátíðarinnar hafa aðstandendur þegar hafið skipulagningu næstu hátíðar. Þegar er hægt að kaupa passa á næstu hátíð á góðum kjörum eða „super early bird” verði fyrir næsta haust.

State of the Art er stofnuð í þeim tilgangi að skapa nýjan vettvang til aukins samstarfs milli listamanna, auka blöndun strauma og stefna og leita að nýju samhengi fyrir tónlist á ýmsum aldri.

Hún er ekki bundin við eina ákveðna tónlistar- eða listastefnu heldur setur sígilda tónlist í nýtt samhengi, blandar saman listamönnum úr mismunandi stefnum og setur listafólk sem aldrei hefur unnið saman áður í nýjar aðstæður.

Nafn hátíðarinnar hefur tvíþætta merkingu: Orðasambandið State of the Art er gjarnan notað um nýjustu tækni og vísindi, það sem efst er á baugi. Í sömu andrá beinir það sjónum að núverandi ástandi í listinni og tengist þannig meginstefi hátíðarinnar, sem er samtími.

Á dagskrá hátíðarinnar mætast ný verk og gömul á framandi fleti.

Þegar rætt er um samtímalist eiga mörg það til að tengja hugtakið við eitthvað sem þykir krefjandi fyrir augu og eyru. State of the Art skorar þau hugrenningatengsl á hólm og hefur léttleikann í fyrirrúmi í grafalvarlegri glímu sinni við samtímann.“

Vinna vel saman

Að hátíðinni standa Bjarni Frímann Bjarnason, Bergur Þórisson og Magnús Jóhann Ragnarsson. Sín á milli hafa þeir viðamikla reynslu af ýmis konar tónlist.

„Bergur er básúnuleikari, upptökustjóri og fleira. Hann hefur meðal annars starfað sem tónlistarstjóri Bjarkar Guðmundsdóttir undanfarin sjö ár, auk þess að vera einn stofnenda Reykjavík Recording Orkestra í Hörpu.

Magnús er píanóleikari og athafnamikill tónlistarmaður á íslandi í dag en hann fæst við tónsmíðar, upptökustjórn og tónlistarflutning í frjálsum djassi, rappi, poppi og ýmsu öðru. Bjarni er hljómsveitarstjóri og tónskáld sem hefur komið víða við í tónlistinni, en sígild tónlist á hug hans allan. Nýverið var Bjarni ráðinn sem listrænn stjórnandi hjá Bit20 hljómsveitinni í Bergen.

Þremenningarnir ásamt Sverri Páli Sverrissyni eru stofnendur hátíðarinnar. Sverrir lauk meistaranámi í verkefnastjórnun árið 2021 og hefur síðan þá fengist við fjölda viðburða, tónleika, leiksýningar og fleira.“

Hér má sjá vel valdar myndir frá hátíðinni eftir Ingibjörgu Friðriksdóttur, Magnús Jóhann Ragnarsson, Kjartan Hreinsson og Birtu Stefánsdóttur: