Segir á­kvörðun um kæru fyrir nauðgun tekna fyrir and­lát flug­manns

Nokkuð hefur verið fjallað um málið síðustu daga. Hödd Vilhjálmsdóttir, talsmaður fjölskyldu flugmannsins, Sólons Guðmundssonar, sagði í viðtali síðasta föstudag að fjölskyldan hefði lagt fram beiðni til lögreglu um að andlát hans yrði rannsakað. Sólon féll fyrir eigin hendi eftir að mál tengd honum voru tekin fyrir innan fyrirtækisins sem hann vann hjá, Icelandair. Hödd sagði fjölskylduna enn telja mörgum spurningum ósvarað og að miklar brotalamir hafi verið á málsmeðferðinni innan Icelandair.

Sólon Guðmundsson var 28 ára þegar hann lést. Hann hafði þá starfað sem flugmaður hjá Icelandair í um sex ár. Í apríl síðastliðnum lagði Sólon fram kvörtun til mannauðsdeildar Icelandair vegna eineltis, sem hann taldi sig hafa orðið fyrir af hálfu tveggja samstarfskvenna.

„Þau vilja fá að vita hvað sonur þeirra á að hafa gert,“ sagði Hödd svo í öðru viðtali daginn eftir.

Tveimur dögum síðar var svo greint frá því að fimm konur hafi sakað Sólon um ofbeldi. Þar af hafi ein kært hann fyrir nauðgun sem eigi að hafa verið framin seint í júlí á þessu ári. Fram kom í yfirlýsingu frá Vilhjálmi H. Vilhjálmssyni, lögmanni kvennanna, að ofbeldið hafi verið andlegt og líkamlegt. Þær hafi allar komið brotunum á framfæri við Icelandair um miðjan ágúst og svo hafi kæra um nauðgun verið lögð fram „stuttu síðar“.

Sjá einnig: Ein kært nauðgun og fjórar segjast hafa verið beittar of­beldi

Fjallað var um það á vef DV í dag að Sólon hefði verið kærður fyrir kynferðisbrot þremur dögum eftir andlát hans eða þann 28. ágúst.

Í frétt DV er vísað í tölvupóstssamskipti á milli Vilhjálms og fjölskyldu Sólons. Þar kemur fram að fjölskyldan hafði samband við Vilhjálm þann 27. ágúst, tveimur dögum eftir andlát Sólons, til að kanna hvort hann gæti gætt hagsmuna þeirra í máli sonar síns. 

Fréttastofa hefur séð afrit af þessum tölvupóstssamskiptum. Þar biður Vilhjálmur foreldrana um að útskýra í hverju málið felist. Þau svara honum með nokkuð ítarlegum lýsingum á málinu frá þeirra sjónarhorni. Vilhjálmur svarar þeim þá um hæl og segist ekki geta tekið málið að sér vegna hagsmunaáreksturs. Hann mælir með öðrum lögmanni. Þá segir hann fjölskyldunni að hún þurfi ekki að hafa neinar áhyggjur af trúnaði um málið enda sé hann bundinn siðareglum lögmanna.

Í sambandi við ákærusvið áður en fjölskyldan hefur samband

Fréttastofa leitaði viðbragða hjá Vilhjálmi sem svaraði skriflega og gaf upp tímalínu málsins hvað aðkomu hans varðar. Í henni segist Vilhjálmur hafa tekið við máli konunnar þann 25. ágúst, sama dag og Sólon lést. Daginn eftir hafi hann strax haft samband við ákærusvið lögreglunnar til að láta vita að hann væri með umbjóðanda sem vildi leggja fram kæru fyrir nauðgun.

Samdægurs, samkvæmt tímalínu Vilhjálms, svaraði ákærusvið og lét hann vita að hann gæti bókað tíma með því að senda tölvupóst. Vilhjálmur sendi póstinn á kærudeildina og fékk til baka baka hlekk á eyðublað sem þarf að fylla út til að leggja fram kæru. Þetta hafi allt gerst þann 26. ágúst. 

Icelandair lét konuna vita

Sama dag, en þó eftir að eyðublaðið barst, hafi konan, þolandinn, haft samband við Vilhjálm. Þá hafði Icelandair haft samband við hana til að láta hana vita að Sólon, meintur gerandi í máli hennar, væri látinn.

Í tímalínunni kemur fram að eftir það hafi Vilhjálmur strax haft samband við kærumóttökuna til að láta vita að meintur gerandi í málinu væri látinn. Þá segist Vilhjálmur hafa rætt málið við ákærusvið í bæði tölvupóstssamskiptum og síma daginn eftir, þann 27. ágúst. 

Þann dag hafði fjölskylda Sólons samband við Vilhjálm til að kanna hvort hann geti tekið mál þeirra að sér. Eins og kom fram í frétt DV, og Vilhjálmur staðfestir, vísaði hann því frá sér vegna hagsmunaáreksturs..

Í tímalínu Vilhjálms kemur svo fram að þann 28. ágúst hafi hann fengið svar frá ákærusviði. Þar hafi komið fram að ef kæra yrði lögð fram yrði hún tekin til afgreiðslu. Kæran var því formlega lögð fram síðar sama dag. Hann segir konuna hafa verið boðaða stuttu seinna í skýrslutöku en vegna mistaka við bókun hafi lögreglan þurft að færa skýrslutökuna til 2. október.