Blöskrar markaðs­setning á réttum: „Þetta eru eins og jólin fyrir okkur“

Á dögunum setti flugfélagið Icelandair færslu á Facebook þar sem fjallað er um réttir, árlegan viðburð í sveitum landsins þar sem fé er dregið í dilka eftir smölun af fjalli. Þar segir að réttir séu skemmtilegur nasaþefur af íslensku sveitasældinni. 

Séu ferðamenn á landinu í september sé hægt að taka þátt í stuðinu allan hringinn um landið.

Auglýsingin hefur vakið undrun þónokkurra og þeirra á meðal er Pálína Axelsdóttir Njarðvík, sauðfjárbóndi á Eystra Geldingaholti. Pálína starfar einnig sem aðstoðarmaður Bjarkeyjar Olsen Gunnarsdóttur matvælaráðherra.

„Réttirnar eru mikilvægur dagur fyrir alla bændur, bæði vegna þess að við erum að fá kindurnar okkar af fjalli og þurfum að sinna þeim og líka vegna þess að þetta er félagslega mjög stór dagur í hverri sveit. Þetta heldur tengslum við fólkið okkar, fólk sem var að koma í sveit til langömmu og langafa kemur enn þá í réttir. Hjálpar okkur og er að gera gagn,“ segir hún í samtali við Vísi.

Nóg af fólki í réttum fyrir

Pálína segir að nægilega margir leggi þegar leið sína í sveitir landsins til þess að leggja hönd á plóg í réttum. Engin þörf sé á að ferðamenn séu hvattir til að mæta til þess eins að þvælast fyrir.

Réttir í heimsfaraldrinum hafi til að mynda verið yndislegar, þótt leiðinlegt hafi verið að geta ekki boðið öllum sem erindi áttu að taka þátt.

„Maður fékk að rétta í friði einhvern veginn. Núna kemst maður ekkert um almenninginn fyrir einhverjum bystanders, sem eru bara að skoða. Maður er að rekast í fólk endalaust þegar maður er að reyna að draga kindurnar sínar og kemst ekkert með þær.“

Sýnir frá réttum en biður fólk um að koma ekki

Pálína heldur úti vinsælli Instagramsíðu þar sem hún sýnir frá lífinu á sveitabænum og segir að hún fái reglulega fyrirspurnir frá erlendum ferðamönnum um réttir og hvort ekki megi taka þátt. Hún biðji fólk ávallt um að mæta ekki óboðið í rétt.

„Það er fullt af hlutum sem maður deilir á samfélagsmiðlum án þess að bjóða fólki í þá. Flestir deila lífinu sínu á Instagram en það þýðir ekki að við viljum fá túrista inn í stofu. Við megum alveg deila svona myndum án þess að hleypa öllum að.

Fólk eigi ekki bókstaflega að draga kindurnar

Þá segir Pálína dýravelferðarhluta málsins ekki vera síður mikilvægan. „Ég vil ekki að fólk sem kann ekki að meðhöndla kindur sé að meðhöndla mínar kindur af því að mínar kindur eru vanar því að það sé farið vel að þeim. Þær séu ekki dregnar í dilkinn heldur bara stýrt.“

Hún hafi til að mynda komið að manni reyna að draga kind í hennar eigu sem hafði lagst niður í almenningnum. „Þú átt ekki að draga hana eftir almenningnum, þú verður bara að leyfa henni að standa upp og hjálpa henni.“

Stærri hópar haldi sig frá

Í umfjöllun um réttir á vef Icelandair segir að fjöldi ferðaþjónustufyrirtækja bjóði upp á dagsferðir í réttir víða í sveitum landsins.

Pálína segir það gott og vel vilji bóndi bjóða einum og einum ferðamanni upp á að upplifa réttir, að því gefnu að passað sé upp á hann og honum kennd handtökin.

„En ef eitthvað risafyrirtæki er að bjóða upp á einhverjar sightseeing-ferðir þá má bara loka hliðinu og ekki hleypa þeim inn.“

Þurfi endilega að hleypa erlendum ferðamönnum að réttum þurfi að setja upp áhorfendapalla.

„Þetta eru eins og jólin fyrir okkur, ég efast um að fólk myndi vilja hafa einhverjar túristaferðir inni í stofu hjá sér á aðfangadagskvöld,“ segir Pálína að lokum.