Innlent

Sam­starfið við Braathen bjó til Loftleiðaævintýrið

Kristján Már Unnarsson skrifar
Geirþrúður Alfreðsdóttir og Haukur Alfreðsson, tvö af börnum Alfreðs Elíassonar og Kristjönu Millu Thorsteinsson.
Geirþrúður Alfreðsdóttir og Haukur Alfreðsson, tvö af börnum Alfreðs Elíassonar og Kristjönu Millu Thorsteinsson. Egill Aðalsteinsson

Samstarf Loftleiðamanna við flugfélag norska skipakóngsins Ludvigs Braathen var í raun byrjunin á Loftleiðaævintýrinu, að mati barna Alfreðs Elíassonar, stofnanda Loftleiða. Þetta kom fram í þættinum Flugþjóðin.

Í fréttum Stöðvar 2 kom fram að saga Loftleiða er oft talin eitt mesta viðskiptaævintýri Íslandssögunnar. Þegar við spyrjum um vendipunktinn víkja þau Geirþrúður og Haukur Alfreðsbörn sögunni aftur til ársins 1952 þegar Loftleiðamenn ákváðu að hætta innanlandsflugi og einbeita sér að millilandaflugi.

Skymaster-flugvélin Hekla við fyrstu flugstöð Loftleiða á Reykjavíkurflugvelli.Halldór Sigurjónsson

„Á sama tíma byrjuðu þeir þetta samstarf við Braathen, sem var mjög heillavænlegt fyrir Loftleiðir,” segir Geirþrúður Alfreðsdóttir flugstjóri.

Norski skipakóngurinn Ludvig Braathen hafði stofnað flugfélagið Braathens SAFE árið 1946. Sama ár keyptu Loftleiðamenn fjögurra hreyfla Skymaster-flugvél, sem hlaut nafnið Hekla.

„Það er í raun stórmerkilegt samstarf sem gekk mjög vel. Og upp frá því byrjar í raun og veru þetta Loftleiðaævintýri,“ segir Haukur Alfreðsson verkfræðingur.

Kristinn Halldórsson varðveitir myndasafn föður síns, Halldórs Sigurjónssonar, fyrsta flugvirkja Loftleiða. Á skjánum er mynd frá Miklavatni í Fljótum þar sem Sigurður Jónsson, Siggi flug, stendur á milli Alfreðs Elíassonar og Kristins Olsen.Egill Aðalsteinsson

Kristinn Halldórsson flugvélaverkfræðingur, sonur Halldórs Sigurjónssonar, fyrsta flugvirkja Loftleiða, segir Loftleiðamenn hafa öðlast dýrmæta alþjóðlega reynslu í rekstri millilandaflugvéla með samstarfi við Braathens.

„Þá flaug Heklan aðra hvora viku til Hong Kong og þá flaug vél frá Braathens fyrir Loftleiðir til Bandaríkjanna á þeirra vegum. Þannig byrjaði þessi samvinna við Braathens, sem var mjög góð fyrir bæði fyrirtækin.

Braathens sá um viðhaldið á vélunum og voru umboðsmenn þeirra víða. Það var bara góð samvinna þar í rúman áratug,“ segir Kristinn.

Alfreð Elíasson í flugstjórasætinu á Heklu á Reykjavíkurflugvelli.Halldór Sigurjónsson

„Með því að vera í samstarfi við Braathen skapast mikill sveigjanleiki. Þeir eru ekki að binda mikið fjármagn í að kaupa flugvélar. Þeir eru í samstarfi við Braathen í leigu á flugvélum og þeir hjálpa þeim með viðhaldið á flugvélunum líka.

Þannig að þeir grípa bara öll tækifæri sem þeir geta og fá alltaf aðstoð frá Braathen,“ segir Haukur.

Fjallað var um sögu Loftleiða frá 1944 til 1973 í þriðja þætti Flugþjóðarinnar á Stöð 2 í kvöld. Áskrifendur Stöðvar 2 og Stöðvar 2+ geta séð þáttinn í streymisveitu Stöðvar 2 hvar og hvenær sem er. 

Hér má sjá brot úr þættinum:

Í fjórða þætti Flugþjóðarinnar, sem er á dagskrá mánudagskvöldið 23. september, verður fjallað um efnahagsáhrif af flugstarfsemi Íslendinga. 

Hér má sjá kynningarstiklu þáttaraðarinnar:

Flugþjóðin Fréttir af flugi Icelandair

Tengdar fréttir

Koma fyrstu þotunnar einn af hápunktum flugsögu Íslands

Koma Gullfaxa, fyrstu þotunnar, er einn af hápunktum flugsögu Íslendinga. Í þættinum Flugþjóðin á Stöð 2 rifja fyrrverandi starfsmenn Flugfélags Íslands upp þætti úr sögu félagsins, þar á meðal daginn þegar Boeing 727-þotan lenti á Reykjavíkurflugvelli í júnímánuði 1967.

Var stórhissa á því hvað pabbi hafði gert mikið

„Við stöndum að eilífu í þakkarskuld við þessa frumkvöðla,“ sagði Lilja Alfreðsdóttir menningar- og viðskiptaráðherra í ávarpi við opnun sýningar í tilefni 80 ára afmælis Loftleiða. Með uppbyggingu á fluginu með Ísland sem tengimiðstöð hefðu þeir lagt grunninn að þeirri öflugu ferðaþjónustu sem til væri orðin í landinu.

Í þessum hópi ræða menn um bilaða flugvélahreyfla

Svo vænt þykir fyrrverandi starfsmönnum Loftleiða um sitt gamla félag að þeir halda úti sérstökum aðdáendaklúbbi. Þar lifir enn gamli Loftleiðandinn þar sem öldungar rifja upp glæsta tíma í flugsögunni.

Flugfreyjur í stuttum pilsum þurftu að teygja sig upp

Þær byrjuðu margar að fljúga á árunum upp úr 1960 og voru fyrsta kynslóðin sem gerði flugfreyjustarfið að ævistarfi. Þær halda enn hópinn, sem telur meira að segja fyrrverandi forsætisráðherra, og rifja upp gamlar sögur úr fluginu.

Mest lesið


Fleiri fréttir

Sjá meira


×

Mest lesið