Hlaupið í rénun

Í tilkynningu á vef Veðurstofu Íslands segir að rafleiðni og vatnshæð í ánni hafi farið hækkandi frá því á laugardaginn 7. september þar til í gær þegar mælingar byrjuðu að lækka aftur. Hækkuð rafleiðni sé merki um jarðhitavatn í ánni. Jarðhitavatnið komi undan Mýrdalsjökli. 

Síðan síðdegis í gær hafi rafleiðnin nálgast aftur eðlileg gildi og þetta hlaup sé því í rénun.

Í lok júlí á þessu ári hafi orðið umtalsvert jökulhlaup í Skálm og áin fltt yfir þjóðveg 1 á kafla. Í því hlaupi hafi talsverður hlaupórói mælst á jarðskjálftamælum í kringum Mýrdalsjökul en svipaður hlaupórói hafi ekki mælst síðustu daga. Þetta sé annar minni atburðurinn sem kemur í kjölfarið á því hlaupi, en annað lítið hlaup hafi orðið í ánni í kringum 10. ágúst.

Náttúruvárvakt Veðurstofunnar haldi áfram að vakta hlaupið en beinir því til ferðafólks á svæðinu að sýna aðgát við upptök árinnar og nærri árfarveginum þar sem enn gæti verið gasmengun á svæðinu.