Innlent

Flæðir inn á hús á Eyrinni í úr­hellis­rigningu

Lovísa Arnardóttir skrifar
Slökkvilið er við störf á Siglufirði.
Slökkvilið er við störf á Siglufirði. Mynd/Fjallabyggð

Dæla í fráveitukerfinu á Siglufirði bilaði í nótt. Úrhellisrigning er á svæðinu og gul viðvörun í gildi. Í tilkynningu frá Fjallabyggð kemur fram að unnið sé að viðgerðum á dælunni en vegna mikillar úrkomu hafi flætt inn í nokkur hús á Eyrinni. Í morgun hafði mælst 92 millimetra úrkoma. Eigendur húsa á Eyrinni eru beðnir að huga að kjöllurum í húsum sínum

Í tilkynningu segir að tvær dælubifreiðar Slökkviliðs Fjallabyggðar séu að dæla vatni upp úr fráveitukerfinu ásamt því sem allar lausar dælur eru notaðar.

„Einnig eru komnir tveir dælubílar frá Akureyri og þriðji á leiðinni. Þá mun berast meiri aðstoð bæði frá Akureyri og Dalvík á næstunni. Einnig eru byrjaðir að fyllast brunnar við Eyrarflöt syðst í bænum. Þar eru dælur í fráveitukerfinu sem því miður hafa ekki undan þessu mikla vatnsmagni.“

Vegagerðin hefur beðið vegfarendur á svæðinu að vera ekki á ferðinni um um Siglufjarðarveg (76) milli Siglufjarðar og Hrauns vegna mikillar hættu á skriðuföllum vegna úrkomu. Bent er á hjáleiðir um Lágheiði (82) og Öxnadalsheiði (1) og Ólafsfjarðarveg (82).

Slökkvilið Færð á vegum Veður Fjallabyggð

Mest lesið


Fleiri fréttir

Sjá meira


×

Mest lesið