Heims­met og lang­þráð banda­rískt gull í síðasta sundinu

Þetta var síðasta einstaklingssundið á þessum Ólympíuleikunum og Bobby Finke var eini sundkarl Bandaríkjanna sem náði að vinna gull í einstaklingsgrein á þessum leikum.

Finke kom í mark á 14:30.67 mínútum og bætti þar með heimsmet Kínverjans Sun Yang frá árinu 2012.

Silfrið fékk Ítalinn Gregorio Paltrinieri og bronsið fór til Írans Daniel Wiffen sem vann gullið í 800 metra sundinu.

Bandaríkjamenn unnu fimm gullverðlaun í einstaklingsgreinum í sundi á þessum Ólympíuleikum þar af unnu konurnar fjögur þeirra.

Hin sænska Sarah Sjöström fylgdi á eftir gullverðlaunum í 100 metra skriðsundi með gulli í 50 metra skriðsundi í dag. Hún kom í mark á 23,71 sekúndum og var á undan Meg Harris frá Ástralíu og Zhang Yufei frá Kína.

Þetta eru fyrstu Ólympíugullverðlaun Sjöström í þessum greinum en hún átti gull í 100 metra flugsundi frá því í Ríó 2016. Hún vann silfur í 50 metra skriðsundi á síðustu leikum í Tókýó.

Þetta var þriðja heimsmetið í sundkeppni leikanna því Kínverjinn Pan Zhanle setti heimsmet í 100 metra skriðsundi og blönduð sveit Bandaríkjamanna setti heimsmet í 4 × 100 fjórsundi.