Mót­mælir gjald­töku við Egilsstaðaflugvöll með gagn­kvæmu skutli

Hópurinn ber nafnið Skutl til og frá Egilsstaðaflugvelli og er að finna með því að smella hér.

Isavia Innanlandsflugvellir, dótturfélag Isavia, hóf gjaldtöku á bílastæðum þriggja innanlandsflugvalla þann 25. júní síðastliðinn. Um er að ræða flugvellina á Akureyri, Egilsstöðum og í Reykjavík. Áform Isavia vöktu mikla athygli og umfjöllun. Sveinn segir málið hafa vakið bylgju af reiði á Austfjörðum.

Bjóða upp á þjónustu sem er ekki til

„Það er enginn ánægður með þetta. Þetta hefur vakið gríðarlega sterk viðbrögð hérna fyrir austan,“ segir Sveinn og líkir gjaldtökunni við það að hótel ætlaðist til þess að hótelgestir smíðuðu eigið herbergi og innréttuðu.

Þá bendir Sveinn einnig á að bílastæðin séu ekki malbikuð nema að hálfu og að aðstæður þar séu þannig að ekki sé verjandi að rukka fyrir þá þjónustu.

„Það er verið að bjóða þarna upp á þjónustu sem er ekki til staðar,“ segir hann.

Aðspurður segir Sveinn að fengið þessa hugmynd úti í göngutúr einn góðan veðurdag. Honum datt í hug að slíkur hópur gæti hjálpað fólki að komast undan bílastæðagjöldunum.

„Þetta eru aðgerðir, ég myndi ekki kalla þetta mótmæli. Við verðum að gera eitthvað til þess að svara þessum bílastæðagjöldum sem þau eru að leggja á hérna á völlunum,“ segir Sveinn en hann er eini umsjónaraðili og ábyrgðarmaður hópsins að svo stöddu.

Hópurinn vaxið hratt

Hann segist vera ánægður með hvað hópurinn hefur vaxið hratt. Sveinn stofnaði hópinn í gær en hann er þegar með um 360 meðlimi. Sveinn segist vera mjög þakklátur samfélaginu fyrir austan fyrir viðbrögðin við hópnum. Án fólksins væri þetta ekki mögulegt.

„Þetta er mjög mikill fjöldi miðað við hvað þetta er lítið svæði. Ég ætlaði svo að starta hópnum á laugardaginn. Byrja fyrst á að safna í hópinn og ræða reglurnar sem ég samdi,“ segir hann en stefnt er á að hópurinn hefji starfsemi sína laugardaginn tuttugasta.

Téðar reglur eru vel útlistaðar í fyrstu færslu hópsins sem Sveinn birti í gær. Í henni segir hann að lykilorð hópsins sé traust. Skutlbeiðnir fara fram í innleggjum á hópnum og er beiðnum svarað í athugasemdum við umrædd innlegg.

Meðal þess sem reglurnar kveða á um er að félagar beri að sýna hver öðrum kurteisi og viðhafa gott orðbragð, skutl skuli gerast innan við mánuð frá beiðni um slíkt til að greiðinn falli ekki í gleymsku, að aðilum sem geta ekki staðið við skutlskuldbingingu sínar sé skylt að útvega hinum skuldaða far með einhverju móti og fleira.