Bestu mörkin: ÞórKA er al­vöru lið byggt upp af heimastelpum

Þór/KA liðið er í þriðja sæti, aðeins þremur stigum á eftir toppliðunum og með markatöluna 25-10. Liðið á líka langmarkahæsta leikmann deildarinnar í Söndru Maríu Jessen, en hún hefur skorað tólf mörk í tíu leikjum.

„Við hlökkum svolítið til að fylgjast með Þór/KA í framhaldinu,“ sagði Helena Ólafsdóttir, umsjónarkona Bestu markanna.

Þær eru í þessari toppbaráttu

„Þær eru í þessari toppbaráttu. Þær eru bara búnar að tapa sex stigum og efstu liðin eru búin að tapa þremur. Það er ekki neitt,“ sagði Mist Rúnarsdóttir, sérfræðingur Bestu markanna.

„Þær eru líka í undanúrslitum í bikar og við þurfum að tala meira um Þór/KA sem titilbaráttulið,“ sagði Mist.

„Við verðum líka að athuga að þetta lið er nánast byggt upp á heimastelpum,“ sagði Helena.

Sjáum þetta ekki í stærstu klúbbum landsins

„23 stelpur búnar að spila. Átján frá Akureyri, ein frá Húsavík, þrír útlendingar og ein á láni frá Val. Þessar upplýsingar fæ ég frá frábærri heimasíðu Þór/KA og ég vil hrósa þeim sem eru að halda utan um umgjörðina fyrir norðan,“ sagði Mist.

„Við sjáum þetta ekki í stærstu klúbbum landsins,“ sagði Þóra B. Helgadóttir, sérfræðingur Bestu markanna. Þær ræddu aðeins Val og Breiðablik í samanburði við að gefa heimastúlkum tækifæri en það má horfa á þessa umfjöllun hér fyrir neðan.