Fréttir Stöðvar 2 öllum opnar frá og með kvöldinu

Hægt verður að horfa á fréttirnar í myndlyklum Stöðvar 2 og Símans og að sjálfsögðu hér á Vísi. Þá verða þær í beinni á Bylgjunni eins og áður. Kvöldfréttirnar hefjast á slaginu 18:30, eins og alltaf.

Erla Björg Gunnarsdóttir ritstjóri fréttastofu Stöðvar 2, Vísis og Bylgjunnar sagði á Vísi fyrir helgi að mikilvægt sé að landsmenn hafi greiðan aðgang að fleiri en einum sjónvarpsfréttatíma. 

„Fréttateymið okkar er öflugt, með faglega og líflega nálgun á fréttamál dagsins og við hlökkum til að verða aftur fastur liður í heimilislífi þjóðarinnar,“ sagði hún.