Arion á­minntur fyrir verk­lag í skoðun á mögu­­legum inn­herja­­svikum

Málið hófst þegar starfsmenn Kauphallarinnar urðu varir við óvenjuleg viðskipti með hlutabréf skráðra félaga sem höfðu hækkað mikið í verði og velta með bréf þeirra. Skoðun Kauphallarinnar beindist að mögulegum innherjasvikum. Félögin eru ekki nefnd í niðurstöðu viðurlaganefndar Kauphallarinnar sem áminnti Arion banka.

Þegar Kauphöllinn kallaði eftir gögnum frá Arion banka um viðskiptin kom í ljós að miðlari bankans hafði rétt við fjárfesti símleiðis í farsíma á vegum bankans. Sá sími var ætlaður til persónulegra nota og var símtalið því ekki tekið upp. Bankinn bað miðlarann um að taka saman skriflega efni símtalanna eftir bestu getu bar punktana undir viðskiptavininn. Kauphöllin fékk minnispunkta um þetta frá bankanum.

Þetta taldi Kauphöllinn ekki fullnægjandi verklag og að skortur á upplýsingunum þýddi að hún gæti ekki sinnt reglulegu eftirliti sínu samkvæmt lögum. Taldi hún Arion banka hafa brotið aðildarreglur Kauphöllarinnar og vísaði málinu til svonefndrar viðurlaganefndar sinnar.

Tíðkaðist að láta starfsmenn fá tvo síma

Nefndin taldi það eðilega kröfu hjá Kauphöllinni að bankinn varðveitti símtalsupptökur. Bankanum bæri skylda til þess að afhenda allar þær upplýsingar sem Kauphöllin teldi nauðsynlegar til þess að sinna lögbundnum skyldum sínum.

Fyrirkomulag sem tíðkaðist hjá Arion banka að láta starfsmenn fá tvo síma, þar af annan sem ekki væri á upptöku, hefði leitt til þess að símtölin sem miðlarinn átti við viðskiptavin í persónulegan síma frá bankanum væru ekki varðveitt. Bankinn gat því ekki afhent þau gögn sem honum bar til Kauphallarinnar. 

Viðurlaganefndin horfði til þess að bankinn hefði viðurkennt að hafa ekki varðveitt símtalsupptökur og að það stríddi gegn hans eigin reglum um varðveislu viðskiptafyrirmæla. Bankinn hefði ennfremur lýst því yfir að gripið hefði verið til ráðstafana til þess að koma í veg fyrir fleiri atvik af þessu tagi.

Niðurstaða nefndarinnar var að áminna Arion opinberlega fyrir að brjóta reglur sem skylduðu hann til að afhenda gögn sem Kauphöllinn óskaði eftir og um viðeigandi skipulag, áhættustýringu, örugg tæknikerfi og hæfni starfsfólks.