Rann­sókn manndrápsmálsins á Sel­fossi á borði héraðssaksóknara

Þetta staðfestir Karl Ingi Vilbergsson, saksóknari hjá embætti héraðssaksóknara, í skriflegu svari við fyrirspurn fréttastofu. Hann segir að þegar málið hafi verið sent héraðssaksóknara í desember hafi enn verið að bíða eftir gögnum erlendis frá. 

„Nú stendur yfir tiltekin gagnaöflun og ég get ekki svarað því hvenær henni lýkur. Með öðrum orðum rannsókn málsins er ekki að fullu lokið svo unnt sé að taka ákvörðun um saksókn,“ segir í svari Karls.

Ekki lengur í farbanni

Karlmaður á þrítugsaldir er grunaður um að hafa orðið Sofiu að bana og jafnframt talinn hafa spillt sönnunargögnum málsins áður en lögreglu var gert viðvart um andlátið. Maðurinn var handtekinn á vettvangi og úrskurðaður í gæsluvarðhald, sem var endurtekið framlengt til 31. ágúst. 

Bar lögreglu þá að sleppa honum úr varðhaldi, þar sem tólf vikna hámarki hafði verið náð og maðurinn ekki ákærður í málinu. Hann var því í kjölfarið úrskurðaður í farbann, sem gilti til 1. desember. Farbannið yfir manninum var ekki framlengt.

Fram kom í umfjöllun fréttastofu, sem byggð var á úrskurðum málsins sem birtir höfðu verið á vef Landsréttar, í janúar að manninum hafi andlátið verið ljóst hálfum sólarhring áður en lögreglu var tilkynnt um það og rannsók hófst. Byggir það bæði á gögnum málsins og framburði mannsins sjálfs. Á þeim hálfa sólarhring er maðurinn sagður hafa verið í samskiptum við marga. Þar að auki hafi hann aðhafst nokkuð, til dæmis við spillingu og undanskot sönnunargagna málsins. 

Maðurinn viðurkenndi að hafa eytt og komið hjá gögnum, sem lögregla telur hafa sönnunargildi, og hafa fært lík Sofiu . Maðurinn neitar þó að hafa banað henni. Í fyrstu skýrslutöku sagði hann hana hafa látist af völdum ofskammts fíkniefna. Hann hafði komið að henni meðvitundarlausri á gólfinu á neðri hæð heimilis þeirra og líkami hennar þá verið orðinn stífur. 

Hann sagði þetta hafa verið um tveimur klukkustundum eftir að þau hættu að stunda kynlíf, sem fól í sér endurtekin kyrkingartök, þar sem maðurinn þrengdi að hálsi konunnar. Því var haldið fram fyrir dómi að umrætt kynlíf hafi staðið yfir frá kvöldi fram til morguns og þau hafi bæði verið undir áhrifum kókaíns. 

Niðurstaða krufningar bendir til þess að andlát konunnar hafi borið að vegna kyrkingar en að kókaíneitrun hafi að minnsta kosti verið meðverkandi í andlátinu. 

Mjög umfangsmikil rannsókn

Í júlí hafði maðurinn breytt ramburði sínum og lýsti atvikum aþnnig að hann hafi farið af heimili þeirra Sofiu morguninn 27. apríl og hún þá verið á lífi. Sá framburður hafi svo aftur breyst og hann sagst síðast hafa séð hana á lífi aðfaranótt 27. apríl, á milli klukkan fjögur og fimm. Hann hafi síðan komið að henni meðvitundarlausri á gólfi heimilisins um tveimur klukkustundum síðar.

Þá hafi hann ákveðið að betra væri að koma fíkniefnum, sem geymd voru á heimilinu, undan og reynt að fela ummerki um neyslu í stað þess að kalla til viðbragðsaðila til að reyna að bjarga lífi Sofiu. Maðurinn er sagður hafa yfirgefið heimilið klukkan átta um morguninn og dvalið á heimili bróður síns fram að hádegi. 

Þá hafi hann farið í bíltúr með systur sinni áður en hún keyrði hann aftur til bróðurins. Bróðirinn hafi þá komið og sótt hann um klukkan þrjú og skutlað honum aftur á vettvang. Bræðurnir voru handteknir á vettvangi þegar andlát Sofiu varð ljóst.

Í nýjasta úrskurðinum, sem er frá því í desember, segir að rannsókn lögreglu á málinu sé mjög umfangsmikil. 

Framburður mannsins hafi tekið umtalsverðum breytingum frá upphafi rannsóknarinnar, og útskýringar hans eru sagðar samrýmast rannsóknargögnum málsins illa. Því er haldið fram að talsvert og stundum verulegt misræmi sé á framburði mannsins og vitna, sem og milli vitna innbyrðis. Þá hafi maðurinn orðið uppvís að því að veita lögreglu rangar og villandi upplýsingar.