Aldrei fleiri for­­seta­efni og nú eða 60 stykki

„Þó hafa alltaf einhverjir farið af stað að stafna undirskriftum sem ekki hafa síðan skilað inn framboði þegar framboðsfresti lýkur,“ segir Brynhildur.

Í raun er um tvo aðskilda ferla að ræða, fyrst þarf að safna meðmælum og svo framboði. Þannig er ónákvæmt að tala um að þeir sextíu séu í forsetaframboði, þessir sextíu eru nú að safna meðmælum og ef þeir ná tilskyldum fjölda meðmælenda.

„Það er formlegt ferli þar sem forsetaefni þarf að tilkynna um framboð, undirrita að viðkomandi vilji fara í framboð og sé með nægjanlegan fjölda meðmæla. Landskjörstjórn mun taka við þessum framboðum þann 26. apríl.“

Stórskotalið á hliðarlínunni

Þegar rennt er yfir listann þá eru þar mörg nöfn sem almennt eru ekki þekkt. Þeir sem þó hafa látið til sín taka og mega heita þekktir eru Arnar Þór Jónsson, Axel Pétur Axelsson, Ásdís Rán Gunnarsdóttir, Ástþór Magnússon, Baldur Þórhallsson, Halla Tómasdóttir, Helga Þórisdóttir og Sigríður Hrund Pétursdóttir. Óhætt er að segja að þessir séu komnir misvel á veg með sín framboðsmál og eins má segja að þeir megi heita mislíkleg til að ná inn á Bessastaði.

Svo er það sem yfir þeim vofir – þeir sem enn eru undir feldi en eru farnir að láta á sér bæra; Jakob Frímann Magnússon þing- og Stuðmaður er á framboðsskóm, Katrín Jakobsdóttir forsætisráðherra er ekki enn búin að ákveða sig hvort hún ætlar fram en veruleg spenna er um það hvað hún ákveður. Né heldur Steinunn Ólína Þorsteinsdóttir leikkona sem ætlar örugglega að bjóða sig fram gefi Katrín kost á sér.

Þá ætlar Jón Gnarr grínari að birta sérstakt myndband í kvöld þar sem hann mun greina frá því hvort hann láti slag standa. Auk þessara má nefna að Halla Hrund Logadóttir orkumálastjóri er heit fyrir framboði.

Alltaf einhver hreyfing á listanum

Framboðsfrestur er til klukkan tólf á hádegi þann 26. apríl og eftir þann tíma kemur í ljós hverjir verða í kjöri til forseta Íslands.

Um það var rætt að vegna óljósrar framsetningar hafi margir meldað sig inn sem forsetaefni fyrir mistök. Þessu hefur nú verið kippt í liðinn og ekki verður betur séð en þetta sé aðgengilegt og einfalt. Engu að síður eru þarna enn 60 manns. Er mikið mál að láta fjarlægja sig af lista?

„Það er mjög lítið mál að hætta við söfnun undirskrifta, einstaklingar gera það sjálfir á Mínum síðum á Ísland.is. Landskjörstjórn og Þjóðskrá geta aðstoðað fólk ef það lendir í vandræðum með að hætta við söfnunina.“

Brynhildur segir alltaf einhverja hreyfingu á lista, fólk bætist við og einhverjir hætta við. Yfir páskana bættust tíu einstaklingar við á lista.

„Söfnuninni lýkur klukkan 12:00 þann 26. apríl, en það er sami tími og þegar framboðsfrestur rennur út.“

Nánar verður fjallað um komandi forsetakostningar í fréttum Stöðvar 2 í kvöld.