Diplómatarnir ræddu við sjálfboðaliðana um helgina

Nú þegar hafa sjálfboðaliðar aðstoðað tvær fjölskyldur, það er að segja tvær mæður og sex börn, af Gasaströndinni og hingað til lands. Von er á tólf til viðbótar á næstu dögum.

„Vandinn er að það hefur hægst svolítið á öllu síðustu daga og viku út af spennunni sem er við Rafah-landamærin. Til þess að koma fólki út þarf að fá grænt ljós frá ísraelskum stjórnvöldum, sem eru að taka sér lengri tíma núna en áður,“segir Bergþóra Snæbjörnsdóttir, sjálfboðaliði. Hún var stödd á flugvelli í Berlín þegar fréttastofa náði af henni tali og er hún á leið út til Kaíró í dag.

„En við erum að vona að við fáum þau skilaboð að þau séu komin á listann og þau komist út morguninn eftir næstu daga. Ég er að fara til að fylgja því eftir og sjá hvort hægt sé að aðstoða einhverja fleiri.“

Eiga fyrir björgun helmings af hópnum

Mjög dýrt er fyrir sjálfboðaliðana að ná fólkinu út af Gaza en töluverðar fjárhæðir hafa safnast fyrir verkinu í söfnun Solaris.

„Hver einasta króna sem safnast fer í að reyna að aðstoða fólk af Gasa. Við höfum sjálf séð um að borga flug, gistingu og uppihald og allt slíkt. Eins og staðan er núna erum við kannski komin með svona rétt rúmlega helming fyrir öllum sem eru úti en svo eru íslensk stjórnvöld á svæðinu og það eru diplómatar í Kaíró og við erum náttúrulega að vona að þau klári þetta verkefni fljótlega,“ segir Bergþóra.

„Nú hafa verið samþykktar fleiri fjölskyldusameiningar. Það tók reyndar mjög langan tíma fyrir þetta fólk að fá fjölskyldusameiningu. Ég veit um einn sem er að fá samþykkt fyrir foreldra sína sem eru komin yfir sjötugt og hann er búin nað bíða í ár. Það var loksins verið að afgreiða nokkra hópa í viðbót. Þessi hópur er ekki á lista stjórnvalda yfir þá, sem verið er að aðstoða yfir landamærin. Við teljum að þau séu ekki á þessum lista því það var bara verið að samþykkja þau. Það er þannig þegar verið er að semja við egypsk og ísraelsk stjórnvöld að það er bara hægt að vera með einn lista í einu.“

Stórslys í aðsigi

Sjálfboðaliðarnir höfðu í meira en viku reynt að ná sambandi við diplómatana þrjá sem eru á vegum íslenskra stjórnvalda í Kaíró en engin svör fengið.

„Við heyrðum frá þeim um helgina og getum kannski ekki mikið sagt um það annað en að ég held að þessir einstaklingar, sem eru þarna úti núna eru að gera allt sem þeir geta, en það er bara verið að fara gríðarlega seint af stað. Nú er staðan bara orðin erfið. Við erum að fá skilaboð frá mjög örvæntingarfullu fólki.“

Ísraelar hafa lýst því yfir að þeir muni fljótlega ráðast í allsherjarinnrás inn í borgina Rafah á suðurhluta Gasastrandarinnar. Rúm milljón Palestínumanna heldur til í borginni, mikill meirihluti þeirra flóttamenn af öðrum svæðum strandarinnar.

Benny Gantz fulltrúi í herráði Ísarel lýsti því yfir í morgun að herinn láti til skarar skríða í Rafah fyrir föstumánuðinn Ramadan, láti Hamas ekki lausa þá gísla sem enn eru í haldi samtakanna. Mikil örvænting er því á svæðinu og spenna við landamæri Egyptalands.

Heldurðu að það takist að bjarga öllu þessu fólki af Gasa áður en þessi innrás hefst?

„Það er það sem við erum að reyna að gera. Ef þetta raungerist, að ráðist verði inn í Rafah þar sem fólk er eins og síld í tunnu, almenningur, konur og börn, þá er það stórslys. Það er á ábyrgð yfirvalda, og þá tel ég líka til íslensk stjórnvöld, að sitja ekkihjá heldur stöðva þetta. Við erum búin að vera að horfa upp á stórslys en ef þetta fer af stað þá er það á einhverju öðru stigi.“