Carl Weathers er látinn

Fjölskylda Weathers greindi frá andláti hans í dag en hann lést í svefni á þriðjudag.

Weathers fæddist 14. janúar árið 1948 í New Orleans og þótti efnilegur fótboltamaður (í amerískum fótbolta) en eftir að hafa ekki verið valinn í nýliðaval NFL lék hann aðeins í þrjú ár sem atvinnumaður. 

Hann ákvað í staðinn að leggja fyrir sig og lék í rúmlega 75 kvikmyndum og sjónvarpsþáttum á ferli sem spannaði hálfa öld.

Hans langþekktasta hlutverk er vafalaust Apollo Creed, þungavigtarheimsmeistarinn, sem barðist við Rocky Balboa í fyrstu tveimur Rocky-myndunum. 

Í þriðju mynd seríunnar breyttist dýnamíkin í sambandi þeirra, Creed þjálfaði þá Rocky fyrir bardaga gegn Clubber Lang sem var eftirminnilega leikinn af Mr. T. Það var svo í Rocky IV sem Weathers stimplaði sig út sem Creed eftir bardaga við rússneska tröllið Ivan Drago.

Þar fyrir utan lék Weathers í níu þáttum af The Mandalorian, þáttum um hausaveiðara í Star Wars-heiminum, hermanninn Dilon í hasarmyndinni Predator og í löggumyndinni Action Jackson.