Blendnar til­finningar fylgja opnun fisk­vinnslunnar í Grinda­vík

Flökunarvélarnar i fiskvinnslu Einhamars Seafood í Grindavík voru ræstar í fyrsta sinn í morgun í tvo mánuði, eða frá því að bærinn var rýmdur þann 10. nóvember á síðasta ári. 

Alda Agnes Gylfadóttir, framkvæmdastjóri Einhamars, segir um stóran viðburð að ræða. 

„Við byrjuðum klukkan sjö í morgun og þegar ég kom hálf sjö voru allir mættir. Það er ekki að sjá að það sé beigur í fólki en auðvitað eru þessar fréttir allskonar.“

Ummæli Magnúsar Tuma Guðmundssonar, jarðeðlisfræðings, í dag, þar sem hann sagði þá sem kjósa að dvelja í Grindavík verða að vera undir það búnir að yfirgefa bæinn hratt, slóu Öldu illa.

„Maður viðurkennir alveg að manni stendur ekkert á sama, það er langur vegur frá. En maður reynir að bera sig ágætlega og treystir því að þessir fræðimenn séu með hlutina þokkalega á hreinu.“

Alda tekur fram að starfsfólkið standi sig allt afskaplega vel.

„Það voru allir mjög spenntir að hefja störf hérna í morgun. Það verður bara að segjast eins og er, þetta var komið gott, tveir mánuðir í aðgerðarleysi.“

Veðurstofan greindi frá því í dag að líkanreikningar bendi til þess að rúmmál kviku sem safnast hefur í kvikuinnskotið undir Svartsengi sé orðið svipað og þegar eldgos hófst þann 18. desember síðastliðinn. Hættan á kvikuinnskoti sem getur endað með eldgosi eykt þannig með hverjum deginum. Pawel, starfsmaður í fiskvinnslunni tekur tíðindum dagsins með fyrirvara og er afar ánægður að vera kominn aftur til vinnu.

„Þetta er frábær dagur fyrir mig því ég get byrjað að vinna. Þetta er mjög gaman og ég er ánægður að geta komið til baka. Fólk er alltaf að segja að það verði eldgos á þessum degi eða öðrum, svo þetta er bara eins og hver annar dagur fyrir mér.“

Rýmingar æfðar daglega í lóninu

Í Bláa lóninu er starfsemin smám saman að komast í eðlilegt horf.

„Við opnuðum síðustu helgi og opnuðum þá fyrir daggesti. Svo erum við smám saman að opna hótelin og horfum fram á fulla opnun frá og með næstu helgi,“ segir Helga Árnadóttir, framkvæmdastjóri sölu, rekstrar og þjónustu hjá Bláa lóninu.

Helga segir gesti lónsins upplýsta um stöðuna við komuna í lónið auk þess sem tölvupóstur sé sendur á þá sem gefa upp netfang við bókun. Rýmingar voru æfðar í lóninu í gær og í morgun.

„Við vitum það að okkar góðu sérfræðingar hjá Veðurstofunni og almannavörnum eru að rýna stöðuna á hverjum einasta degi og meta stöðuna. Við fylgjumst með þeim og hlustum á þá. Það helsta sem menn eru að horfa á sem hættuna hér er helst til hraunflæði. Við erum auðvitað komin með þessa góðu varnargarða og það er staðan eins og hún lítur út í dag.“