Bréfpokar undir matarleifar ekki lengur í verslunum

Oddur Ævar Gunnarsson skrifar 9. janúar 2024 16:24

24 milljón bréfpokar hafa farið út undanfarna mánuði. Reykjavíkurborg

Frá og með morgundeginum mun Sorpa hætta dreifingu bréfpoka undir matarleifar í verslunum. Áfram geta íbúar sótt bréfpokana endurgjaldslaust á endurvinnslustöðvum Sorpu og í verslun Góða hirðisins.

Þetta kemur fram í tilkynningu frá Sorpu. Þar kemur fram að sérsöfnun á matarleifum hafi hafist á síðasta ári á suðvesturhorni Íslands sem liður í aukinni flokkun við heimili.

Sótt 24 milljón poka

Bréfpokum undir matarleifar hafi verið dreift frítt til íbúa samhliða nýju kerfi og í helstu matvöruverslunum. Sorpa kann þeim verslunum sem tóku þátt í verkefninu miklar þakkir.

Segir í tilkynningunni að sú dreifing hafi gengið vel. Íbúar höfuðborgarsvæðisins hafi sótt um 24 milljónir poka frá því verkefnið hófst. Sorpa býst við því að það magn af bréfpokum dugi heimilunum í eitt og hálft ár.

Þá segir Sorpa að árangur samræmdrar flokkunar sé mikill og hreinleiki matarleifanna sem íbúar skila um 98%. Enn er þó töluvert af matarleifum eftir í tunnunni fyrir blandað rusl og því til mikils að vinna að ná sem mestum matarleifum úr blönduðu tunnunni á nýju ári, að því er segir í tilkynnignunni.

Sorpa Sorphirða Verslun Matvöruverslun Umhverfismál