Vilja að gistiskýlin séu opin allan daginn yfir jólin

Krafa mannanna er sú að þurfa ekki að yfirgefa gistiskýlið klukkan tíu hvern morgun til að finna sér einhvern stað til að vera á, og þá sérstaklega núna um jólin. 

„Það er enginn að biðja um að fá gefins einhverja ölmusu eða kastala. Bara að þurfa ekki að fara úr húsi klukkan tíu á morgnana. Svo við getum átt möguleika á að byggja einhvern grunn fyrir lífsgæði, einhver grunnlífsgæði,“ segir Ragnar Erling Hermannsson. Hann hefur sjálfur verið heimilislaus í um eitt og hálft ár og allan þann tíma segir hann það mest hafa komið sér á óvart hversu erfitt þetta er. Að þurfa að koma sér á milli staða endalaust.

Gistiskýlin í Reykjavíkurborg þjónustu alla heimilislausa á höfuðborgarsvæðinu. Þau eru opin frá því klukkan 17 seinnipart og til tíu á morgnana. Eftir klukkan tíu stendur mönnunum til boða að dvelja á kaffistofu Samhjálpar. Nýlega var opnunartíminn þar lengdur fyrir hópinn.

„Við náttúrulega bara höngum þar. Sitjum og bíðum þangað til getum farið í gistiskýlið sem opnar klukkan fimm.“

Hver er munurinn að vera á þessum tveimur stöðum?

„Það það þurfa ekki að fara út úr húsi. Maður getur bara róað taugakerfið,“ segir Ragnar og að erfitt sé að breyta aðstæðum sínum við þennan aðbúnað.

„Ég er búin að gera tvær eða þrjár tilraunir til að fá mér vinnu, heiðarlegar tilraunir. En það er ekki sjens.“

Róbert Guðmundsson var einnig við mótmæli í Ráðhúsinu og sagði gott að vita af stuðningi fólks við aðgerðir þeirra. Hann hvetur borgarfulltrúa til að endurskoða það að loka á daginn um jólin.

„Og segja okkur þannig út í kuldann. Ég er með hálsbólgu nú þegar og þarf ekkert að bæta við mig veikindum,“ segir Róbert.

Eðlileg krafa

Mennirnir voru í Ráðhúsinu við mótmæli í nokkra klukkutíma. Á meðan þeim stóð lauk síðasta fundi borgarráðs fyrir jól og komu því nokkrir borgarfulltrúar og ræddu við mennina að því loknu.

„Mér finnst þetta mjög eðlileg krafa að þau sem eru án heimilislaus fái að vera á einum stað allan sólarhringinn. Það er mjög eðlilegt að þú þurfir ekki að vera að flytja þig á milli staða til að komast inn í hlýjuna og þetta er mjög mikið álag sem er á heimilislausu fólki nú til dags,“ segir Sanna Magdalena Mörtudóttir borgarfulltrúi Sósíalistaflokksins.

Hún segir Samhjálp að gera góða hluti en það sé hægt að gera meira.

„Eins og hópurinn bendir á þarf að finna eitthvað viðeigandi þá þarf að hlusta á það,“ segir Sanna.

Borgarfulltrúi Sjálfstæðisflokksins tekur undir þetta.

„Við í Sjálfstæðisflokknum höfum talað fyrir því að og flutt tillögur um það að vera með herbergjasambýli og fleiri úrræði þar sem er ekki bara lokað yfir daginn og fólki hent út. Það þarf fjölbreytni í þessu eins og öllu öðru,“ segir Ragnheiður Alda María Vilhjálmsdóttir.

Hún segir það alltaf hafa verið skýra kröfu frá notendum að þeir þurfi ekki að yfirgefa úrræðið sem þeim stendur til boða á daginn.