Fjár­hags­á­ætlun Reykja­víkur sam­þykkt í nótt

A-hluti fer samkvæmt áætlun síðan batnandi út áætlunartímabilið til samræmis við markmið fjármálastefnu. Þetta kemur fram í tilkynningu frá Reykjavíkurborg. Þar segir að gert sé ráð fyrir batnandi afkomu A- og B-hluta, og að A-hluti skili jákvæðri niðurstöðu ári fyrr en áætlanir gerðu ráð fyrir.

Dagur B. Eggertsson borgarstjóri mælti fyrir frumvarpi um fjárhagsáætlun í ellefta sinn í gær. Umræður um áætlunina hófust um hádegisbil í gær og stóðu því í um tólf klukkustundir.

Fram kemur í tilkynningu borgarinnar að Dagur hafi sagt í upphafi umræðunnar að það væri góð tilfinning að koma í seinni umræðu á þessum fallega desember degi og kynna með stolti sína elleftu fjárhagsáætlun.

Hann sagði að hagræðingaraðgerðir á yfirstandandi ári hafi skilað viðsnúningi upp á tíu milljarða og að það hafi verið nokkuð meira en gert var ráð fyrir.

„Það er ekkert nýtt að í rekstri sveitarfélaga þurfi að horfa í hverja krónu,“ sagði Dagur og að skuldastaðan væri nú um helmingi lægri en þegar meirihluti Besta flokksins og Samfylkingarinnar tók við árið 2010

Fjárhagsleg samskipti við ríkið mesti áhættuþátturinn

Þá sagði hann að áfram verði haldið að þróa og byggja betra borgarsamfélag samhliða fjölgun borgarbúa. Hann sagði einn stærsta áhættuþáttinn í rekstri borgarinnar vera fjárhagsleg samskipti við ríkið og afar mikilvægt væri að takist að stoppa það gat sem hefur myndast þar sem allra fyrst.

„Full fjármögnun málaflokks fatlaðs fólks er lykilatriði til að tryggja fjárhagslega sjálfbærni í fjármálum borgarinnar til framtíðar. Þar er um að ræða stórar tölur, svo milljörðum skiptir. Segir það sína sögu að þrátt fyrir miklar blikur á lofti í ytra efnahagsumhverfi borgarinnar og að framundan séu krefjandi kjarasamningar þá er stærsti einstaki áhættuþátturinn í afkomunni, áhætta vegna fjárhagslegra samskipta við ríkið. Vanfjármögnun á málaflokki fatlaðs fólks er ekki bara grafalvarleg fyrir þjónustu sveitarfélaga og fjárhag heldur mun á endanum bitna á þeim sem eiga rétt á þjónustunni og bíða frekari uppbyggingar í honum,“ segir í greinargerð með áætluninni.

Í tilkynningu á vef Reykjavíkurborgar fyrr á árinu sagði að mikilvægt sé að draga fram stöðuna í málaflokki fatlaðs fólks. Halli í rekstri málaflokksins hafi farið vaxandi á síðustu árum og reynst vanfjármagnaður um 9,3 milljarða króna árið 2022.

Enn að jafna sig á Covid-19

Þar kemur enn fremur fram að í fjármálastefnunni séu lagðar þær línur sem þurfi til að vaxa úr þeim vanda sem heimsfaraldur Covid-19 skildi eftir sig í fjármálum borgarinnar.

„Í áætlun næsta árs er gætt aðhalds í framlögum til málaflokkanna þótt áfram verður passað upp á fulla fjármögnun framlínuþjónustu. Borgarsjóður nýtur nú góðs af því að fjárhagur fyrirtækja borgarinnar er öflugur og sterkur eftir endurskipulagningu á síðasta áratug. Áfram verður unnið að umbótum í fjármagnsskipan í þágu heildarhagsmuna samstæðunnar,“ segir enn fremur og að dregið verði saman í fjárfestingaráætlun A-hluta borgarinnar þótt áfram verði passað upp á að sinna viðhaldsmálum og uppbyggingu innviða í vaxandi borg.

„Fjárveitingar til viðhaldsmála hafa stóraukist á undanförnum árum og staðinn er vörður um þær.“

Hægt er að kynna sér bæði fjárhagsáætlun og greinargerðir með henni hér að neðan.

Frumvarp að fjárhagsáætlun 2024

Greinargerð með fjárhagsáætlun 2024 og fimm ára áætlun 2024-2028

Greinargerð fagsviða og b-hluta fyrirtækja með fjárhagsáætlun 2024