„Hann er bara þjálfarinn minn í höllinni og pabbi minn heima“

Andri er alvanur því að vera með föður sinn, Rúnar Sigtryggsson, sem þjálfara. Hann lék undir hans stjórn hjá Stjörnunni, til skamms tíma hjá Haukum og nú hjá Leipzig í Þýskalandi.

Rúnar tók við Leipzig í nóvember á síðasta ári eftir stutt stopp hjá Haukum. Hann tók tímabundið við liðinu til að byrja með en eftir gott gengi samdi hann svo við það til 2025.

Andri kom svo til Leipzig frá Haukum í sumar og hefur spilað mikið og vel að undanförnu. Hann gerði nýjan samning við félagið til 2026 í síðustu viku.

„Hann er bara þjálfarinn minn í höllinni og pabbi minn heima. Við erum vanir því og hingað til hefur það gengið vel,“ sagði Andri aðspurður hvernig það sé að spila undir stjórn föður síns.

„Hann er líka stundum þjálfari heima en maður verður bara að lifa með því,“ bætti Andri kankvís við enda býr hann hjá foreldrum sínum í Leipzig.

Aðalmaðurinn í liði Leipzig er áðurnefndur Viggó Kristjánsson. Hann kom til liðsins frá Stuttgart en þar léku þeir Andri saman um hríð.

„Það er mjög gott að vera með Viggó. Ég þekki hann líka frá tíma okkur saman í Stuttgart. Hann er alltaf duglegur að hjálpa mér og gefa mér góð ráð til að bæta minn leik. Hann er líka frábær leikmaður og við spilum vel saman,“ sagði Andri.

Viggó er marka- og stoðsendingahæsti leikmaður Leipzig á tímabilinu og hefur komið með beinum hætti að 126 mörkum í þýsku úrvalsdeildinni. Seltirningurinn er í miklum metum hjá félaginu.

„Hann er klárlega lykilmaðurinn í liðinu. Á æfingum segir hann hvaða leikkerfi henta best. Hann les leikinn vel. Hann hefur líka stigið upp þegar aðrir lykilmenn hafa dottið út. Hann gerir það vel og það er gaman að spila með honum,“ sagði Andri.