„Miklu lengri og harðari skjálftar“

Fannar Jónasson, bæjarstjóri í Grindavík, hefur verið í stöðugu sambandi við sitt fólk en sjálfur er hann ekki í bænum. Hann segir skjálftana svipaða og þá í fyrrinótt sem héldu vöku fyrir íbúum í bænum.

„Þetta eru harðir skjálftar. Það skelfur stöðugt um þessar mundir,“ segir Fannar.

„Þetta er vissulega óþægilegt og þreytandi. Þetta er verra þegar það ber að á nóttunni, þá missir fólk svefn. En þegar skjálftar eru svona stórir og tíðir þá er það vissulega óþægilegt.“

Sirrý Ingólfsdóttir starfar í íþróttamiðstöðinni í Grindavík þar sem krakkarnir æfa íþróttir og íbúar mæta í ræktina og sund.

„Þetta er svolítið mikið. Þetta eru allt öðruvísi jarðskjálftar, miklu lengri og miklu harðari,“ segir Sirrý.

Þetta sé enn þá óþægilegra en skjálftar í aðdraganda síðustu eldgosa.