„Karl­menn vilja ekkert vita um þvag­leka“

„Ég hugsa að breytingar á samfélaginu hafa gert það að verkum að við konur þurfum ekki að fela allt okkar. Það má bara ræða öll svona vandamál sem hafa kannski verið feimnismál því karlmenn hafi ekki viljað heyra þau. Þeir vilja ekkert heyra um einhvern þvagleka, þeir bara snúa við.“

Fanney er nýjasti viðmælandi Spegilmyndarinnar. Þar bendir hún á að karlmenn geta einnig átt við vandamál að stríða tengt grindarbotninum og geta því einnig verið með þvagleka, risvandamál og allskonar vandamál tengt blöðruhálskirtlinum.

Grindarbotnsæfingar mikilvægari en fólk gerir sér grein fyrir

Fanney nefnir að oft finnist konum þær vera einar í heiminum að takast á við vandamál sem hægt er að rekja til grindarbotnsins sem er í ójafnvægi hvort sem hann er of slappur, þreyttur eða ofspenntur. Stundum sé stór partur af meðferðinni að konur geti sagt frá vandamálunum sínum og að einhver hlusti á þær. 

„Margar konur hafa reynt að opna sig við lækna sem hafi ekki getað hjálpað, en það er svo mikilvægt að þær fái viðurkenningu á vandamálinu. Grindarbotnsæfingar geta verið flóknar þegar fólk veit ekki hvernig á að gera þær æfingar. 

Hvernig áttu að kunna að spenna einhvern vöðva þegar þú veist ekki einu sinni hvar hann liggur?

Ég byrja alla tíma á því að sýna konum grindarbotninn því flestar konur halda að þetta sé bara rétt í kringum leggöngin en svo er hann bara miklu stærri. Um leið þú veist hvar hann liggur er miklu auðveldara að átta sig á því hvernig hann hreyfist og spennist. 

Ef þú hugsar um að það að vera með herðarnar alltaf upp að eyrum allan daginn þá færðu vöðvabólgu, höfuðverk og þessa spennu, þú finnur óþægindi og líður ekki vel. Flestir vöðvarnir okkar virka eins og grindarbotninn er ekkert öðruvísi.

Spennuverkir í grindarbotni mikið vandamál

Það geta verið verkir í mjöðmum og mjóbaki sem er mjög algengt, svona þungir þreytuverkir í mjöðmum sem fara aldrei alveg. Það getur verið sársauki við kynlíf, óþægindi eftir fullnægingu og krampatilfinning. Þú getur verið með þvagleka. Hægðatregða er mjög algeng í tengslum við svona spennuvandamál og það eru svolítið fjölbreytt einkenni og þú getur verið með einhver en ekki endilega öll.“

Fanney segir að margir kvensjúkdómalæknar geti skoðað og greint viðkomandi en flestir sendi konur áfram til sjúkraþjálfara sem sérhæfa sig í meðferðum við þessum vandamálum.

„Fyrsta sem maður gerir er að taka góða sögu til hjálpa manni að greina vandann og svo skoðar maður hreyfingar í mjöðmum og mjóbaki en til þess að greina beint vandamál með grindarbotninn þá gerum við það með þreyfingu upp í leggöng.

Þvagleki getur verið mjög hamlandi

Það eru fleiri konur þarna úti með bindi daglega heldur að þú getur ímyndað þér. Bara til öryggis. Ef þær hósta eða hnerra þá kemur eitthvað smá,“ segir Fanney og telur að þær konur sem eru með minniháttar þvagleka séu ekki endilega að leita sér aðstoðar. 

„Margar halda að þetta sé eðlilegt ástand eftir barneignir þar sem þetta er svo algengt. Það er kannski eðlilegt fyrstu vikurnar eftir barneignir en við segjum aldrei að það sé eðlilegt ástand þrátt fyrir að þetta sé algengt, það eru til lausnir.“

Þáttinn í heild má hlusta á hér fyrir neðan.