For­eldrar á Sel­fossi ó­á­nægðir með yfir­töku Hjalla­stefnu á leik­skóla

„Þetta er í raun bara skerðing á leikskólaplássum,“ segir ein móðir sem fréttastofa ræddi við. Önnur segir að verið sé að bjóða börnunum upp á að vakna upp einn daginn og fara í allt annan leikskóla en þau séu vön, þar sem stór munur sé á stefnu Árbæjar hingað til og Hjallastefnunni.

Forsaga málsins er sú að í lok september barst foreldrum í Árborg erindi frá bæjaryfirvöldum þar sem farið var yfir stöðu leikskólamála í sveitafélaginu, þar sem skortur hefur verið á plássum. Þá fygldi með könnun, þar sem spurt var um afstöðu þeirra til þess að fá Hjallastefnuleikskóla í flóruna.

„Þeir foreldrar sem ég talaði við og samstarfsfólk svaraði þessari spurningu með það í huga að það ætti að fjölga leikskólunum. Að þetta væri lausnin, svo það væri hægt að taka inn börn á biðlistum og yngri börn,“ segir Elísabet Kristín Kristmundsóttir grunnskólakennari og móðir drengs í Árbæ.

Í umræðum sem skapast hafa um málið í Facebook-hópnum „Íbúar á Selfossi“ er enda bent á að talað hafi verið um „viðbót“ í erindinu, sem var undirritað af Fjólu S. Kristinsdóttur bæjarstjóra.

Þar stóð meðal annars:

„Meðfylgjandi er könnun sem kannar hug foreldra til þess að fá leikskóla í sveitarfélagið sem starfar eftir og verður rekinn af Hjallastefnunni sem er kærleiksmiðuð og skapandi lýðræðisstefna. Með þeirri viðbót við þá leikskóla sem þegar eru reknir af sveitarfélaginu er verið að auka við val foreldra að velja sér þá stefnu sem leikskólar starfa eftir. Einnig er verið að virða val foreldra og efla íbúalýðræði.“

Skerðing, ekki aukning

Ljóst er að foreldrum finnst þeir hafa verið blekktir og val þeirra síður en svo virt en Erika Laue, sem á dóttur í Árbæ, segir að með þessari tilhögun sé í raun verið að skerða bæði leikskólapláss og val foreldra.

„Það var enginn að búast við því að einum leikskólanum yrði breytt í Hjallastefnuleikskóla,“ segir Erika en Árborg rekur nú sex leikskóla alls. 

„Við héldum að það væri verið að opna nýjan leikskóla og að foreldrar gætu þá ráðið hvort þeir sendu börnin þangað eða ekki. En þau voru sem sagt bara að spá í að breyta einum leikskólanum og það vantar leikskólapláss. Dóttir mín komst til dæmis ekki inn fyrr en tveggja og hálfs árs. Þannig að þetta er í raun bara skerðing á plássum,“ segir Erika og vísar þar til þess að margir foreldrar vilji ekki setja eigin börn á Hjallastefnuleikskóla.

Plássum fyrir þau muni fækka eftir breytinguna.

Breytingin var samþykkt í bæjarráði 25. október síðastliðinn, foreldrum tilkynnt um hana með tölvupósti 26. október og greint frá málinu í Sunnlenska 27. október.

Erika segist alls ekki vilja að dóttir sín sé á Hjallastefnuleikskóla en hennar bíði nú tveir valkostir, báðir slæmir; að hafa barnið áfram í Árbæ gegn vilja sínum eða taka það úr því umhverfi sem það þekkir og frá vinum sínum.

Vill ekki að verið sé að hræra í krílunum

Elísabet á yngri son sem hún segist geta hugsað sér að setja á Hjallastefnuleikskóla en hún er einnig gagnrýnin á hraðar breytingar hjá börnum sem séu búin að venjast allt öðru en Hjallastefnan gengur út á. 

Hjallastefnan sé gjörólík þeirri stefnu sem nú sé við lýði í Árbæ; kynin aðskilin og skólabúningar.

„Við höfum ekki fengið neinar upplýsingar um það hversu miklar breytingarnar verða núna,“ segir Elísabet en samkvæmt hennar heimildum eigi nýr leikskólastjóri Hjallastefnunar að taka við á fimmtudaginn en reksturinn ekki að færast alfarið undir Hjallastefnuna fyrr en næsta sumar.

„Sem foreldri þá vill maður ekkert að það sé verið að hræra mikið í þessum krílum um miðjan vetur, sum nýbúin í aðlögun eða að venjast nýrri deild,“ bætir Elísabet við. Þá vakni spurningar um það hvað yfirvöld hyggjast gera ef fjöldi foreldra þiggur boð um flutning vegna breytinganna.

„Maður spyr sig hvert þau ætla að senda þessi börn ef það eru kannski foreldrar 50 barna sem óska eftir flutningi... hvert á að setja þau,“ segir Elísabet. „Hvort þau séu að vona að einhverjir vilji færa börnin sín yfir á Hjallastefnuleikskóla.“

Starfandi leikskólastjóri neitar að tjá sig

Boðað hefur verið til fundar með foreldrum í kvöld til að kynna og fara yfir breytingarnar. 

Fréttastofa hefur heimildir fyrir því að starfsmönnum Árbæjar hafi verið boðið að starfa þar áfram en ekki er vitað hvort þeim var einnig boðið að flytja sig um set, líkt og foreldrum barnanna.

Harpa Dan Þorgeirsdóttir aðstoðarleikskólastjóri og starfandi leikskólastjóri Árbæjar vildi ekki svara spurningum um málið þegar eftir því var leitað.