Gerðu árásir við stærsta sjúkrahús Gasa

Árásirnar eru sagðar hafa eyðilagt flesta vegi að Shifa-sjúkrahúsinu sem er á norðurhluta Gasastrandarinnar, en yfirvöld í Ísrael hafa hvatt fólk til að flýja þaðan til suðurs. Hundruð þúsunda óbreyttra borgara halda þó enn til í norðri og þá meðal annars vegna þess að Ísraelar hafa einnig gert árásir í suðri.

Ísraelski herinn birti á dögunum tölvuteiknað myndband sem sýna á hvernig Hamas-liðar hafa grafið göng undir Shifa-sjúkrahúsinu og sé með bækistöðvar sínar þar undir. Einnig voru birt myndbönd sem eiga að vera af yfirheyrslum yfir Hamas-liðum, þar sem þeir segja frá göngum undir sjúkrahúsinu.

Talsmenn Hamas segja það ekki rétt og að Ísraelar ætli sér að gera árásir á sjúkrahúsið.

Talið er að Hamas hafi grafið umfangsmikið net ganga undir stóran hluta Gasastrandarinnar.

Mikil óreiða ríkir á Gasaströndinni eftir linnulausar árásir Ísraela frá 7. október og Sameinuðu þjóðirnar sögðu frá því í morgun að þúsundir manna hefðu rutt sér leið inn í vöruhús Palestínustofnunar SÞ og tekið aðan matvæli og aðrar nauðsynjar.

AP fréttaveitan hefur eftir Thomas White, sem leiðir aðgerðir SÞ á Gasa, að atvikið væri til marks um bresti á samfélagslegri samkennd á Gasa, vegna óreiðunnar.

Íbúar Gasastrandarinnar hafa þó aftur aðgang að síma- og netsambandi eftir að það var tekið af á dögunum, samhliða innrás Ísraela í norðurhluta Gasastrandarinnar.

Gasaströndin er eitthvert þéttbýlasta svæði heimsins. Það er um fjörutíu kílómetrar að lengd og um tíu kílómetrar að breidd, eða 365 ferkílómetrar, og þar búa um 2,3 milljónir manna. Tölur eru á reiki en talið er að meira en milljón manna séu á vergangi innan Gasastrandarinnar en þau geta ekki farið þaðan.

Forsvarsmenn ísraelska hersins tilkynntu í gær að meiri neyðarbirgðum yrði hleypt inn á Gasaströndina frá Egyptalandi. Vonast er til þess að birgðirnar, eða matur, vatn og lyf, muni leiða til þess að fleiri íbúar norðurhluta Gasastrandarinnar fari til suðurs, eins og Ísraelar hafa kallað eftir.

Reynir að firra sig ábyrgð

Benjamín Netanjahú, forsætisráðherra Ísrael, sagði í gærkvöldi að yfirmenn öryggisstofnanna ríkisins bæru ábyrgð á því að vígamenn Hamas-samtakanna hefðu komið Ísraelum á óvart og getað banað um 1.400 manns í árásum á suðurhluta Ísrael þann 7. október.

Þetta sagði hann í tísti eftir blaðamannfund í gær þar sem hann sagðist aldrei hafa fengið nokkra viðvörun um ætlanir Hamas-liða og að allir forsvarsmenn öryggisstofnana Ísrael hefðu verið þeirrar skoðunar að leiðtogar Hamas hefðu áhuga á viðræðum.

Sjá einnig: „Verk­efni okkar er skýrt“

Netanjahú eyddi tístinu þó í morgun eftir að hann var harðlega gagnrýndur fyrir það og þar á meðal af Benny Gantz, ráðherra í þjóðarstjórn Ísraela og Yair Lapid, leiðtoga stjórnarandstöðunnar.

Gantz kallaði eftir því í morgun að Netanjahú drægi ummæli sín til baka og sakaði hann um að grafa undan hernum á mikilvægum tíma. Hann sagði að á stríðstímum sem þessum bæri leiðtogum að sýna ábyrgð og styðja herinn.

Lapid sló á svipaða strengi og sagði Netanjahú reyna að komast undan ábyrgð með því að benda á öryggisstofnanir sem væru að berjast gegn óvinum Ísrael.

Eftir að hann eyddi fyrsta tístinu, birti Netanjahú annað þar sem hann baðst afsökunar.