Gríðar­legt magn af rottu­skít og um tuttugu tonnum af mat fargað

Greint hefur verið frá því að þriffyrirtækið Vy-þrif sem er í eigu Davíðs Viðarssonar, stórtæks veitingamanns, hafi verið með kjallarann á leigu þar sem matvælin voru hýst við óheilnæmar aðstæður samkvæmt upplýsingum frá matvælaeftirlitinu.  Maturinn var talinn hættulegur til neyslu og lauk förgun á honum á mánudaginn fyrir viku. 

Samkvæmt heimildum fréttastofu var magnið af matvælunum rúm tuttugu tonn. Sautján frystikistur voru í kjallaranum þar sem allskyns matvörur voru geymdar; kjöt, þurrvörur, frystivörur, sósur og fleira. Matnum var fargað með lífrænum úrgangi á móttökustað SORPU í Álfsnesi. Þangað fóru sendibílar margar ferðir með fulla bíla af mat.

Ekki hafa fengist upplýsingar frá heilbrigðiseftirlitinu hvort til hafi staðið að selja matvælin til veitingastaða eða annarra aðila. Samkvæmt upplýsingum fréttastofu er málið til rannsóknar hjá eftirlitinu.

Samkvæmt heimildum fréttastofu var mikill rottugangur í kjallaranum. Þegar heilbrigðiseftirlitið mætti í úttekt sína var afar mikið magn af rottuskít á gólfi geymslurýmisins. 

Fasteignafélagið Sigtún ehf er eigandi rýmisins en leigði það út til annars félags. Samkvæmt heimildum fréttastofu vildi félagið losna úr rýminu en var fast með leigusamning. Úr varð að félagið framleigði rýmið til þriffyrirtækisins Vy-þrif.

Vy-þrif er í fyrirtækjaskrá skráð á rúmlega fimmtugan karlmann að nafni Davíð Viðarsson. Þangað til fyrir skemmstu hét hann Quang Le og heitir raunar enn á Facebook. Hann á einnig veitingahúsakeðjuna Pho Víetnam. Þá er hann skráður fyrir félaginu NQ fasteignir ehf sem festi í fyrra kaup á Herkastalanum við Kirkjustræti í miðbæ Reykjavíkur fyrir á hálfan milljarð króna. Herkastalinn hýsti Hjálpræðisherinn áratugum saman. Í dag er gistiheimili skráð í Herkastalanum sem hefur rekstrarleyfi fyrir 125 gesti. 

Eldjárn Árnason, lögmaður Vy-þrifa, sagði í samtali við fréttastofu um helgina að þrátt fyrir að Davíð væri eigandi veitingastaðakeðjunnar væri hann ekki rekstraraðili. Samkvæmt heimildum fréttastofu eru þær upplýsingar rangar. Davíð sér um daglegan rekstur þeirra. 

Samkvæmt fyrirtækjaskrá er Davíð einnig skráður fyrir 40 prósenta eignarhlut í WOKON Mathöll ehf. Kristján Ólafur Sigríðarson, eigandi Wok On veitingastaðakeðjunnar, segir staðinn aldrei hafa keypt matvæli sem geymd voru í Sóltúni 20. 

Hann hafi verslað við Davíð fyrir einhverjum árum en þá í gegnum matvörumarkaðinn Vietnam Market sem Davíð er skráður eigandi að. Kristján segist jafnframt enga vitneskju hafa haft um lagerinn í kjallara Sóltúns. 

Ekki hefur náðst í Davíð þrátt fyrir ítrekaðar tilraunir, hvorki símleiðis né í gegnum skilaboð. Þegar fréttastofa reyndi að ná tali af forsvarsfólki Vy-þrifa fyrir helgi var síminn áframsendur á karlmann sem skildi ekkert í því að síminn hefði verið framsendur á hann. Hann tengdist Vy-þrifum ekki neitt. Hann væri þó vinur eigandans. 

Fréttastofa óskaði eftir frekari svörum frá heilbrigðiseftirliti Reykjavíkur vegna málsins fyrir helgi og viðtali við fulltrúa eftirlitsins. Tómas G. Gíslason framkvæmdastjóri eftirlitsins óskaði eftir því að fá skriflegar spurningar vegna málsins. Þeim hefur ekki enn verið svarað þrátt fyrir ítrekun.

Samkvæmt upplýsingum frá eftirlitinu er málið í rannsókn og þegar það hefur verið tekið saman verður eftirlitsskýrsla gerð opinber.