Hver stelur af barnaleiði?

Uppfært klukkan 16:03

Birgitta segir í samtali við Vísi að þau hafi gengið í kirkjugarðinn áðan og allir munirnir séu komnir á sinn stað, nema einn agat seinn. Þau séu mjög þakklát og voni að síðasti steinninn skili sér líka.

Upprunalega frétt má lesa að neðan.

Birgitta Jeanne Sigursteinsdóttir og Finnbogi Darri Guðmundsson ræddu áföll liðinna ára í viðtali á Vísi á dögunum. Alexandra Eldey var aðeins tuttugu mánaða þegar hún lést eftir skyndileg veikindi í júní, 2022, þegar fjölskyldan var á ferðalagi til Spánar.

Það var svo í mars síðastliðinum sem þeim fæddist andvana drengur sem fékk nafnið Ísak. Systkinin eru jarðsett í Kópavogskirkjugarði. Þangað fóru þau hjónin á laugardaginn eins og þau gera á nokkurra daga fresti.

„Við förum yfirleitt í kirkjugarðinn á nokkra daga fresti. Við fórum í garðinn í dag [innsk: laugardag] og það er búið að stela skrautsteinum af leiðinu hjá Alexöndru og Ísaki,“ segir Birgitta í færslu á Facebook síðdegis í gær.

Þau hafi keypt þrjá agat steina erlendis sem voru útskornir eins og hjörtu.

„Við tókum þá með okkur í handfarangri til að passa upp á að þeir kæmust pottþétt á sinn stað. Þeir standa fyrir hin börnin okkar þrjú sem létust sem fóstur og hafa því mikið tilfinningalegt gildi fyrir okkur,“ segir Birgitta.

Þau skilji ekki hverjum detti í hug að gera svona.

„Að auki voru þarna líka tveir aðrir litlir hjartasteinar sem voru teknir fyrir einhverjum vikum, tigers eye og mánasteinn en Alexandra var grafin með svoleiðis steina hjá sér svo við vildum hafa þá á leiðinu líka.“

Þau Birgitta og Finnbogi eru vægast sagt leið vegna þessa.

„Við erum í sjokki yfir þessu og bara viljum ekki trúa því að fólk geti verið svona ömurlegt. Við grátbiðjum þann sem stal steinunum að skila þeim. Við viljum líka hvetja þau sem hafa verið með börn í garðinum að athuga hvort geti verið að barn hafi tekið þessa fallegu steina ófrjálsri hendi.“

Um er að ræða tvo miðlungs stóra agat hjartasteina sem eru hvítir með röndum og smá brúnum lit, lítill hjartalag tigers eye steinn, lítill hjartalaga mánasteinn og lítil oturstytta úr plasti.

Otur var uppáhaldsdýr Alexöndru og fékk Darri sér húðflúr af otur til minningar um Alexöndru.

Þau sem hafa upplýsingar um hvað gæti hafa orðið af mununum á leiði barnanna geta haft samband við Birgittu í gegnum Facebook.