Biles vann sigur í fjölþrautinni en þetta er í áttunda sinn sem hún vinnur til gullverðlauna í greininni. Hún bætti þar með met Alfreds Jochim sem vann sjö gullverðlaun í fjölþraut á árunum 1925-33.
Biles sneri aftur á fimleikagólfið á móti í byrjun mánaðarins eftir tveggja ára hlé frá keppni.
Á bandaríska meistaramótinu um helgina sýndi hún svo að hún hefur engu gleymt. Biles fékk 118,450 í heildareinkunn, 3,9 meira en Shilese Jones sem vann silfrið.
Hin 26 ára Biles bætti líka annað met en hún er elsta konan sem verður bandarískur meistari í fjölþraut.
Eftir rúman mánuð hefst HM í fimleikum í Antwerp og talið er líklegt að Biles verði þar á meðal keppenda. Svo styttist auðvitað í Ólympíuleikana í París á næsta ári.