Myndi núna leggja til að Íslendingar undir fimmtugu yrðu ekki bólusettir

Þrátt fyrir það segir hann að miðað við þær upplýsingar sem nú liggi fyrir myndi hann leggja til að Íslendingar undir fertugu eða fimmtugu yrðu ekki bólusettir með bóluefni við veirunni.

Þetta segir Kári í viðtali í hlaðvarpinu Skoðanabræðrum, sem aðgengilegt er á Patreon. 

Kári hafði á sínum tíma hörð orð uppi um þá sem kusu að láta ekki bólusetja sig þegar kórónuveirufaraldurinn stóð sem hæst. 

„Mér finnst persónulega eins og það sé drullusokksháttur að láta ekki bólusetja sig. Ekki vegna hagsmuna okkar sem einstaklinga heldur vegna hagsmuna samfélagsins. Ég myndi ekki gráta það ef þess yrði krafist af fólki að það færi í bólusetningu. Ég veit að það er fullt af fólki þarna úti sem fyndist það mikill fasismi og ljótt að krefjast þess að fara í bólusetningu,“ sagði Kári í nóvember 2021.

Áður hafði hann sagt réttlætanlegt að takmarka að einhverju leyti frelsi þeirra sem vildu ekki bólusetningu gegn Covid-19 til umgengni við annað fólk.

Hann horfir á málið frá öðru sjónarhorni núna, reynslunni ríkari.

„Núna hafa staðið upp hinir ýmsu vísindamenn úti í heimi og haldið því fram að það hafi ekki verið rétt að bólusetja alla. Benda á að það sé fjöldinn allur af tilfellum þar sem fólk fær bólgu í hjartavöðva og svo framvegis. Og jafnvel þegar það komi að pestinni þá hafi minni hundraðshluti þeirra sem fengu pestina fengið bólgu í hjartavöðva heldur en þeir sem voru bólusettir.

Ég er ekki með þessar tölur í hausnum akkúrat núna, en sá möguleiki er fyrir hendi að sumt af þessu kunni að vera rétt. Ef við færum aftur af stað og við vissum það sem við vitum núna og þessi pest kæmi, þá held ég að ég myndi leggja til að fólk undir fimmtugu yrði ekki bólusett. Annaðhvort undir fertugu eða fimmtugu. Bara vegna þess að með öllum lyfjum, hvort sem það eru bóluefni eða annað, þá ertu alltaf að meta annars vegar akkinn af því og hins vegar áhættuna sem þú tekur. Læknisfræði í dag er ekkert annað en sífellt mat á líkum,“ segir Kári sem var nýskriðinn á áttræðisaldur þegar faraldurinn hófst.

Eldra fólk og fólk með undirliggjandi sjúkdóma var bólusett fyrst og svo yngri hópum hleypt að. Kári var mjög þakklátur fyrir bólusetninguna sem hann fór í.

Sakaður um að græða milljarða á lyfjasölu

Kári segir aðila í íslensku samfélagi viðhalda alls konar bulli um faraldurinn, en að stjórnvöld hafi gert það besta sem þau gátu til að halda pestinni í skefjum og koma í veg fyrir að fólk meiddist. Ákvarðanir hafi verið teknar sem hafi reynst alveg réttar þegar litið er til baka og einnig sumar sem hafi reynst rangar. Allt sem menn hafi séu forsendurnar sem eru til staðar á tíma ákvörðunarinnar.

„Þegar þessi faraldur varð raunveruleiki fyrir okkur hér uppi á Íslandi í mars árið 2020 þá leit þetta út fyrir að vera fyrsti kafli í sögunni um útrýmingu mannkyns. Þetta leit út fyrir að vera alveg gífurlega alvarlegt. Núna þegar við horfum til baka þremur árum seinna er enginn vandi að segja: Þetta var ekkert svona hættulegt. Og þar með fara þessar aðgerðir að hljóma eins og mikið ofríki. Ég held að vísu að það sé mjög gott að á meðan á þessu stóð hafi alls konar fólk í íslensku samfélagi verið að mótmæla þessum aðgerðum vegna þess að ef það hefði ekki verið þá byggjum við ekki við lýðræði,“ segir Kári.

„Nú fæ ég ansi mikinn fjölda af alls konar póstum og beinlínis árásum á götum úti þar sem ég er ásakaður um að selja lyf á meðan á faraldrinum stóð. Ég hafi verið að sprauta fólk með bóluefnum og grætt milljarða á að flytja inn lyf og bóluefni og svo framvegis. Ég var til dæmis á Blönduósi með fjölskyldu minni þegar það stoppaði bíll og maður byrjaði að öskra á mig að fólk sé enn þá að deyja af lyfjum sem ég hafi gefið þeim í faraldrinum. Hann jós yfir mig þessum skömmum,“ segir Kári sem segist þó hafa tekið í höndina á manninum sem hafi verið með hlýtt handartak.

Bull að beitt hafi verið ofríki og fasisma

Kári telur að Íslendingar hafi staðið sig vel þegar kom að því að hleypa öðrum sjónarmiðum að en þeim sem stjórnvöld fóru fram með. Þá sé einnig heilbrigðismerki að það sé til fólk sem kokgleypir ekki við öllu á svipstundu. „En ég varð ekki var við neitt offors þegar það kom að fólki sem hafði aðra skoðun,“ segir Kári.

„Að halda því fram að beitt hafi verið ofríki og fasisma og viljandi verið að taka af fólki borgararéttindi, þetta er bara svo alrangt. Að halda því fram að bóluefni séu voðalega vond og að það séu einhver fylgiefni í þessu sem hafi verið voðalega vond, það er bara bull,“ segir Kári.