Vikulegar tölur úr laxveiðiánum

Það er sérstakt að skoða listann núna í lok júlí og sjá enga laxveiðiá komna yfir 1.000 laxa. Þverá Kjarrá er komin í 668 laxa og Urriðafoss sem hefur haldið toppnum undanfarin þrjú ár hið minnsta fram að miðju tímabili er aðeins í fimmta sæti listans og veiðin 563 laxar. Það er ekkert slæm veiði per stöng en minna en veiðimenn eru vanir á því svæði. Rangárnar eru ekki ennþá komnar í gang en það hefur svo sem alveg gerst áður að þær komi ekki inn fyrr en í byrjun ágúst svo það er ekki sama stressið þar fyrir sumrinu, ennþá.

Norðurá er í þriðja sæti með 588 laxa og hennar besti tími búinn og áin komin í mjög lítið vatn sem gerir hana mjög erfiða ofan í hlýja sólardaga og sést það á vikuveiðinni sem var aðeins 35 laxar.  Selá og Hofsá eru svona nokkurn veginn einu björtu punktarnir á listanum þó veiðin sé aðeins lakari en í fyrra en kuldatíðin í júlí dró aðeins úr veiðinni en annars eru menn þar á bæ mjög kátir með gang mála enda ágúst og september oft mjög góðir í þeim báðum.

Einu árnar sem í raun geta státað af góðri vikuveiði voru Selá með 165 laxa, Hofsá með 151 lax, Miðfjarðará með 146 og Langá með 136 laxa. Listann í heild sinni má finna á www.angling.is