70 sm bleikja úr Þingvallavatni

Það eru fáir veiðimenn sem eru jafn slungnir í að finna stóra fiska, hvort heldur lax eða silung, eins og Nils Folmer. Við hjá Veiðivísi birtum á hverju sumri fréttir af þssum frábæra veiðimanni og þeim tröllvöxnu fiskum sem hann veiðir á hverju ári. 

Nils var við veiðar á ION svæðinu við Þingvallavatn í gær, nánar til tekið í Þorsteinsvík, og landaði þar bleikju sem er um 70 sm löng og þykk eftir því. Þessar bleikjur sjást reglulega í vatninu á nokkrum stöðum og Þosteinsvíkin er einn af þeim. Nils sagðist hafa séð stærri bleikju en hún féll ekki fyrir flugunni. Veiðin á ION hefur annars gengið ágætlega í vor en minna af 90 sm og stærri fiskum hafa þó sést og merkilegt að engin yfir 86 sm hafi veiðst ennþá. Þeir eru þarna, það er alveg á hreinu og líklega bara tímaspursmál hvenær sá fyrsti í þessari yfirstærð veiðist á þessu tímabili.