Janus Daði til Magdeburg

Kolstad á í miklum fjárhagsvandræðum og leikmenn og starfsfólk félagsins var beðið um að taka á sig launalækkun. Undirbúningstímabilið hófst í gær en Janus mætti þá ekki til æfinga.

Hann hefur nú samið við Magdeburg sem vann Meistaradeild Evrópu á síðasta tímabili. Þar hittir hann fyrir samherja sína í íslenska landsliðinu, Ómar Inga Magnússon og Gísla Þorgeir Kristjánsson.

Sá síðarnefndi er meiddur og spilar væntanlega ekki meira með á árinu. Janus fær því það hlutverk að fylla skarð Gísla ásamt Svíanum Felix Claar og Norðmanninum Christian O'Sullivan.

Janus þekkir vel til í Þýskalandi en hann lék með Göppingen á árunum 2020-22. Hann gekk í raðir Kolstad í fyrra og varð þrefaldur meistari með liðinu á síðasta tímabili. Janus lék vel með Kolstad og var valinn í úrvalslið norsku úrvalsdeildarinnar.