Azpilicueta valdi At­letico Madrid

Cesar Azpilicueta hefur verið leikmaður Chelsea síðan árið 2012 og fyrirliði liðsins síðan 2019. Hann hefur nú ákveðið að róa á önnur mið en Azpilicueta var mikið orðaður við Barcelona fyrir síðustu leiktíð.

Hann hefur hins vegar ákveðið að ganga til liðs við Atletico Madrid og kemur til liðsins á frjálsri sölu þrátt fyrir að hafa átt eitt ár eftir af samningi sínum en Chelsea ákvað að sleppa Azpilicueta af virðingu við fyrirliðann.

Íþróttablaðamaðurinn Fabrizio Romano greinir frá því að samkomulag sé í höfn á milli Azpilicueta og forráðamanna Atletico og að hann verði tilkynntur sem leikmaður liðsins í allra nánustu framtíð.

Azpilicueta hefur leikið 350 leiki á ferli sínum með Chelsea en hann kom til liðsins frá franska liðinu Marseille eftir að hafa leikið með Osasuna á Spáni. Hann á þar að auki að baki 45 landsleiki fyrir spænska landsliðið og kom við sögu í tveimur leikjum liðsins á HM í Katar í lok síðasta árs.