Sandra öflug í risasigri

Metzingen var í sjötta sæti deildarinnar fyrir leikinn í kvöld og á ekki lengur möguleika á að næla sér í Evrópusæti fyrir næstu leiktíð. Sandra Erlingsdóttir leikur með félaginu en hún er á sinni fyrstu leiktíð með Metzingen.

Leikurinn í dag gegn botnliði Waiblingen var fremur ójafn. Metzingen var 17-7 yfir í hálfleik og úrslitin þá ráðin. Að lokum varð munurinn sautján mörk, lokatölur 32-15.

Sandra Erlingsdóttir skoraði fjögur mörk úr sex skotum fyrir Metzingen í kvöld og gaf þar að auki tvær stoðsendingar. Liðið á einn leik eftir í þýsku deildakeppninni á þessu tímabili.