Íslendingaliðið hóf undanúrslitin á sigri

Kadetten Schaffhausen og Pfadi Winterthur höfnuðu í öðru og þriðja sæti deildarkeppninnar á tímabilinu og því ljóst að um spennandi undanúrslitaeinvígi var að ræða.

Heimamenn í Kadetten, með Óðinn Þór Ríkharðsson fremstan í fylkingu tóku þó völdin snemma leiks og náðu mest átta marka forskoti í fyrri hálfleik. Liðið leiddi með sjö mörkum þegar flautað var til hálfleiks, staðan 21-14, og stefndi í að Kadetten myndi vinna auðveldan sigur.

Gestirnir voru þó ekki á því að gefast upp og mættu ákveðnir til leiks í síðari hálfleik. Liðsmenn Pfadi Winterthur skoruðu tíu af fyrstu tólf mörkum seinni hálfleiksins og náðu forystunni í stöðunni 23-24. Þá tóku heimamenn hins vegar við sér á ný, náðu tökum á leiknum á nýjan leik og unnu að lokum sex marka sigur, 34-28.

Óðinn Þór Ríkharðsson var eins og svo oft áður drjúgur í markaskorun fyrir Kadetten og skoraði tíu mörk í kvöld.

Kadetten leiðir því einvígið 1-0 eftir leik dagsins, en vinna þarf þrjá leiki til að komast í úrslit.