„Börn eru alltaf börn þótt málin séu grafalvarleg“

Gæsluvarðhaldsúrskurður héraðsdóms Reykjaness kvað á um að hin handteknu í málinu sættu gæsluvarðhaldi til næsta fimmtudags en einangrun var aflétt á sunnudagskvöld yfir fjórmenningunum. Ólöf Ásta Farestveit, forstjóri Barna- og fjölskyldustofu, segir að þeim hafi verið nokkur vandi á höndum upphaflega því þau geti ekki tryggt einangrun barna.

„Við höfum ekki tök á því að tryggja einangrun, við getum tryggt ákveðinn aðskilnað vegna sakamáls en við getum ekki tryggt einangrun. Við höfum lokaða deild á Stuðlum þar sem börn eru vistuð sem hafa brotið af sér og við reynum að nýta það.“

Börn séu þannig ekki einangruð heldur er starfsmaður með faglega þekkingu ávallt til staðar að sögn Ólafar.

„Það er mjög mikilvægt að börn séu ekki höfð í einangrun og við höfum engin tök á því en það er mjög mikilvægt að það sé ekki gert.“

Ekki megi gleyma að um börn sé að ræða.

„Þetta er náttúrulega mjög alvarlegt mál þegar börn undir átján ára eru aðilar að svona alvarlegu sakamáli, og það er náttúrulega meðhöndlað sem slíkt, en jafnframt þurfum við að hafa í huga að þetta eru börn undir átján ára.“

Fá að viðra sig og spila Playstation

Ólöf var spurð hvernig fyrirkomulagið væri varðandi þá tvo sem vistaðir eru á lokaðri deild á Stuðlum.

„Þau hafa aðgang að setustofu og Playstation. Þau eru ekki í samskiptum, þau eru lokuð inni vissulega, en svo er reynt að fara út með þau og viðra þau og þá einn og einn í einu og tveir starfsmenn með. Það er mjög mikilvægt að þau upplifi ekki þessa miklu innilokun því það getur reynst börnum mjög íþyngjandi.“

Hugnast ekki unglingafangelsi

Málið sýni að þörf sé á betra úrræði fyrir börn sem viðriðin eru sakamál. Ólöfu hugnast þó ekki unglingafangelsi líkt og eru í Evrópu og Bandaríkjunum heldur sé meðferðarúrræði heillavænlegast.

„Börn eru alltaf börn þótt málin séu grafalvarleg og ég dreg ekkert úr því en það skiptir svo miklu máli að það sé unnið með þau þar sem heilinn er ekki orðinn nægilega þroskaður til að taka rökstuddar ákvarðanir. Stundum eru börn í neyslu samhliða því að þau eru með hvatvísi og ofvirkni eða fjölþættan vanda og þá spilar það afskaplega illa saman. Það er allt að vinna að reyna að ná til þessara einstaklinga sem allra fyrst,“ segir Ólöf sem leggur höfuðáherslu á að grípa inn í snemma þegar börn sýna áhættuhegðun.

„Ég bind miklar vonir við farsældarlögin okkar og að þau muni grípa þessi börn áður en svona langt er komið að þau séu aðilar í svona sorgarsögu eins og þarna er. Því þetta er sorgarsaga á allan hátt.“