Réttar­höldum yfir meintum þjóðar­morðingja frestað

Um það bil 800 þúsund Tútsar voru drepnir í Rúanda árið 1994 af öðrum þjóðflokki, Hútus-þjóðflokknum, sem Kabuga tilheyrir. 

Kabuga stýrði vinsælli útvarpsstöð þar sem hann er sagður hafa hvatt Húta til þess að myrða Tútsa. Með því hafi hann ýtt frekar undir þetta stærsta fjöldamorð Afríku. Þá fjármagnaði hann að einhverju leyti her Húta.  

Kabuga flúði frá Rúanda á tíunda áratugnum en fannst í Frakklandi í bænum Asnieres-Sur-seine árið 2020. Þar hafði hann verið í felum um nokkurt skeið. 

Réttarhöld yfir Kabuga hófust í Haag í september á síðasta ári en nú hefur þeim verið frestað þar sem lögmenn hans halda því fram að hann sé með elliglöp og því sé ekki hægt að rétta yfir honum. Þau fara líklegast aftur í gang þegar búið er að leggja mat á heilsu hans en Kabuga er orðinn níutíu ára gamall.