Hverjir eru mótherjar Vals? Sexfaldir Evrópumeistarar í lægð

Handboltaliðið Göppingen kemur frá samnefndri borg í sunnanverðu Þýskalandi þar sem búa um 60 þúsund manns. Göppingen er iðnaðarborg mitt á milli Frankfurt og München og í borginni eru höfuðstöðvar fyrirtækisins TeamViewer AG, aðalstyrktaraðila enska úrvalsdeildarliðsins Manchester United.

En nóg um staðsetningu og starfsemi í Göppingen. Í borginni er rík handboltahefð og ekki er langt síðan liðið var í fremstu röð í evrópskum handbolta. Frá stofnun félagsins hefur Göppingen fagnað þýska meistaratitlinum ellefu sinnum - þar af utandyra í tvígang - og sigri í Evrópukeppni sex sinnum. 

Fjórir Evróputitlar á sjö árum

Gengi Göppingen heima fyrir hefur reyndar ekki verið stórglæsilegt undanfarna áratugi, en félagið varð seinast þýskur meistari árið 1972. 

Félaginu hefur þó gengið mun betur í Evrópukeppnum undanfarið eftir langa eyðimerkurgöngu. Göppingen vann þáverandi útgáfu af Meistaradeildinni í tvígang árin 1960 og 1962, en gerði svo frábæra hluti í Evrópubikarkeppninni á seinasta áratug þessarar aldar. 

Á sjö ára tímabili vann Göppingen Evrópubikarkeppnina fjórum sinnum - árin 2011, 2012, 2016 og 2017.

Oft verið kallað Íslendingalið

Við Íslendingar erum fljótir að nefna þau lið sem samlandar okkar leika með Íslendingalið. Göppingen hefur oftar en einu sinni og oftar en tvisvar fengið þann stimpil á sig.

Þar ber kannski hæst að nefna Geir Hallsteinsson, sem „opnaði leið íslenskra handknattleiksmanna til Vestur-Þýskalands 1973,“ eins og segir í umfjöllun Handbolta.is um vistaskipti Geirs til Göppingen, en hann lék með liðinu tímabilið 1973-1974.

Þá hafa íslenskir leikmenn á borð við Rúnar Sigtryggsson (1998-2000), Jaliesky Garcia (2003-2009), og Janus Daða Smárason (2020-2022) einnig leikið með liðinu, ásamt Gunnari Einarssyni, sem lék með liðinu á árunum 1975-1979.

Gengið heima fyrir ekki upp á marga fiska

Eins og áður segir er gengi Göppingen í þýsku úrvalsdeildinni undanfarna áratugi ekkert til að hrópa húrra fyrir. Það er ef miðað er við stöðu félagsins um miðja seinustu öld. 

Liðið hafnaði í fimmta sæti deildarinnar á seinasta tímabili, en það var besti árangur liðsins frá því tímabilið 2014-2015 og á sama tíma jöfnun á besta árangri liðsins á þessari öld.

Þrátt fyrir góða frammistöðu í Evrópudeildinni undanfarnar vikur og mánuði er staða Göppingen í þýsku deildinni svo enn verri þetta tímabilið. Liðið situr í 14. sæti deildarinnar með aðeins 12 stig eftir 21 leik, 18 stigum frá Evrópusæti og aðeins sex stigum fyrir ofan fallsvæðið.

Það er því ljóst að þrátt fyrir forna frægð félagsins hafi Valsmenn getað lent í mun erfiðari andstæðingum í 16-liða úrslitum Evrópudeildarinnar. Ef Valsliðið spilar jafn vel gegn Göppingen og það gerði í fyrri hálfleik gegn sænsku meisturunum í Ystad í gær verða möguleikarnir á sæti í átta liða úrslitum að teljast nokkuð góðir.

Valur og Göppingen eigast við í tveimur leikjum í 16-liða úrslitum, heima og að heiman, síðar í þessum mánuði. Þýska liðið mætir á Hlíðarenda þann 21. mars og seinni leikurinn fer fram á heimavelli Göppingen, EWS Arena, viku síðar.