Liver­pool að finna taktinn í þann mund sem það undir­býr hefnd fyrir París

Liverpool og Real Madríd mættust í leik sem verður ef til vill minnst fyrir hvað átti sér stað fyrir leik heldur en leiksins sjálfs. Fjöldi stuðningsfólks beggja liða, Liverpool þó meira en Real, lenti í miður skemmtilegri lífsreynslu fyrir leik þar sem lögreglan í París hafði enga stjórn á aðstæðum og beitti meðal annars táragasi.

Það var svo í þessum mánuði sem UEFA, Knattspyrnusamband Evrópu, axlaði loks ábyrgð á því sem fram fór fyrir utan Stade de France-leikvanginn í París. 

Hvað leikinn í París varðar þá var Liverpool mun sterkari aðilinn en Thibaut Courtois átti stórleik í marki Madríd og sá til þess að staðan var enn jöfn á 59. mínútu þegar Federico Valverde óð upp hægri vænginn.

Úrúgvæinn Valverde gaf á endanum fyrir markið þar sem Vinícius Júnior var mættur til að skora það sem reyndist eina mark leiksins. Fór að svo að Real Madríd vann leikinn 1-0 og Liverpool mistókst að hefna fyrir tapið frá því 2018. Í aðdraganda úrslitaleiksins hafði mikið hafði sá leikur verið mikið verið í umræðunni en Mohamed Salah fór meiddur af velli og Loris Karius, þáverandi markvörður Liverpool, gerði skelfileg mistök.

Þegar drátturinn í 16-liða úrslitunum var ljós stefndi allt í að Real færi enn og aftur með sigur af hólmi. Liverpool var hvorki fugl né fiskur og þó lærisveinar Carlo Ancelotti væru ekki upp á sitt besta virtist sem liðið frá Bítlaborginni væri heillum horfið.

Það skemmtilega við fótboltann er hins vegar hversu fljótt hlutirnir geta breyst. Allt í einu hefur Liverpool unnið tvo örugga 2-0 sigra í röð og virðist vera að finna sitt fyrrum form.

Real Madríd tapaði óvænt fyrir Mallorca þann 5. febrúar en hefur síðan unnið fjóra leiki, þar á meðal tvo sem tryggðu liðinu sigur á HM félagsliða. Það að vinna fjóra leiki er aldrei slæmt en að spila fjóra leiki á aðeins 13 dögum getur haft áhrif.

Gestirnir frá Spáni verða án hins reynslu mikla Toni Kroos og hins kraftmikla Aurélien Tchouaméni í leiknum á morgun. Það munar um minna og ætti sú staðreynd að gefa Liverpool byr undir báða vængi. Hvað þá ef framherjinn Darwin Núñez verður með. Hann virðist loks vera búinn að finna út hvar markið er staðsett. Hann meiddist hins vegar á öxl í sigrinum gegn Newcastle United um helgina.

Leikur Liverpool og Real Madrid hefst klukkan 20 í kvöld og er í beinni útsendingu á Stöð 2 Sport 2.

Meistaradeild Evrópu er á Stöð 2 Sport en upplýsingar um útsendingar má finna hér. Meistaradeildin er hluti af Stöð 2 Sport erlent sem kostar 3.990 krónur á mánuði.