Fer með hlutverk Harley Quinn í nýrri mynd um Jókerinn

Nýja myndin ber nafnið Joker: Folie à Deux og er hún væntanleg á næsta ári. Um er að ræða framhald af Óskarsverðlaunamyndinni Joker sem kom út árið 2019. Í þeirri mynd var það leikarinn Joaquin Phoenix sem fór með hlutverk Jókersins og hlaut hann Óskarsverðlaun fyrir leik sinn.

Í nýju myndinni snýr Pheonix aftur í hlutverki Jókersins en Gaga bregður sér í hlutverk Harley Quinn í fyrsta sinn. Hún er þó enginn nýgræðingur í kvikmyndabransanum því hún sló eftirminnilega í gegn í myndinni A Star Is Born og var tilnefnd til Óskarsverðlauna fyrir frammistöðu sína. Þá fór hún einnig með aðalhlutverk í myndinni House of Gucci árið 2021.

Í gær birti Gaga fyrstu mynd af sér í hlutverki Harley Quinn á Instagram síðu sinni.

Gleður Robbie að sjá Gaga taka við hlutverkinu

Persónan Harley Quinn kom fyrst fram á sjónarsviðið í teiknimyndaseríunni Batman: The Animated Series árið 1992. Til að byrja með var persónan geðlæknir sem meðhöndlaði Jókerinn á geðveikrahæli en varð ástfangin af honum og endurfæddist sem eitt af illmennum Batman-heimsins.

Síðustu ár hefur hlutverk Harley Quinn verið í höndum áströlsku leikkonunnar Margot Robbie sem lék hana í Suicide Squad myndunum tveimur og kvikmyndinni Birds of Pray. Í viðtali við MTV segist Robbie þó vera glöð að sjá Gaga taka við hlutverkinu.

„Þetta gleður mig mjög mikið. Eins og ég hef sagt frá upphafi þá vil ég að Harley Quinn verði ein af þessum persónum, eins og Macbeth og Batman, sem gengur frá einum stórleikara til annars,“ sagði Robbie.

Hildur Guðna sögð semja tónlistina

Todd Phillips leikstýrir nýju myndinni rétt eins og þeirri fyrri. Söguþráður myndarinnar er enn ókunnur en það hefur þó verið greint frá því að þetta verði eins konar söngleikur. Því hefur þótt vel við hæfi að fá hina hæfileikaríku Gaga til þess að vera með.

Samkvæmt tímaritinu Variety mun okkar eigin Hildur Guðnadóttir sjá um tónlistina í myndinni en hún vann Óskarsverðlaunin svo eftirminnilega fyrir tónlistina í fyrri myndinni.