Dularfullt félag safnaði fúlgum fjár fyrir lygarann á þingi

Santos hefur verið mikið milli tannanna á fólki en komið hefur í ljós að hann hefur vafið um sig umfangsmiklum vef lyga. Repúblikanar í New York og á þingi hafa kallað eftir því að hann segi af sér, sem hann segist ekki ætla að gera.

Sjá einnig: Krefjast afsagnar lygarans á þingi

Áðurnefnd ávísun var send til félags sem kallast RedStone Strategies og átti peningunum að vera varið til kaupa á auglýsingum til stuðnings þingmannsins. Maðurinn sem hringdi sagði félagið hafa safnað 800 þúsund dölum og vildi safna sjö hundruð þúsund dölum til viðbótar.

Kosningayfirvöld Bandaríkjanna hafa RedStone þó ekki á skrá sem svokallaða pólitíska aðgerðanefnd eða PAC.

Samkvæmt lögum í Bandaríkjunum mega slíkar nefndir safna miklu fé til stuðnings bandarískra stjórnmálamanna. Nefndirnar mega þó ekki starfa með beinum hætti með umræddum stjórnmálamönnum, þurfa að vera skráðar hjá alríkiskosningastjórn Bandaríkjanna og þurfa að gefa upp lista yfir hverjir gefa þeim peninga.

Safni einhver meira en þúsund dölum eða meira til vegna stjórnmálastarfs þarf að skrá viðkomandi félag sem PAC innan tíu daga, samkvæmt kosningalögum Bandaríkjanna.

Segir Santos hafa beðið sig um að safna peningum

New York Times segir að maðurinn sem hringdi fyrir hönd RedStone hafi lengi verið virkur innan Repúblikanaflokksins í New York en kjördæmið sem Santos vann er þar.

Heimildarmaður New York Times segir að maðurinn sem hringdi fyrir hönd RedStone hafi verið beðinn um það af Santos sjálfum í aðdraganda kosninganna. Santos hafi beðið hann um að hringja í bakhjarla sem hafi verið búnir að veita framboði hans þá hámarksupphæð sem lög leyfa og fá þá til að gefa meira til RedStone.

Santos og lögmenn hans hafa neitað að svara spurningum blaðamanna um félagið en það hefur tengingu við þingmanninn. Árið 2021 var Devolder Organization, sem er fyrirtæki í eigu Santos, á skrá hjá RedStone sem einn af stjórnendum þess.

Opinber gögn sýna einnig að félag í eigu systur Santos gaf RedStone sex þúsund dali í apríl í fyrra. Daily Beast hefur einnig sagt frá tengingu Santos við RedStone.

Fjármál þingmannsins eru til rannsóknar hjá bæði alríkis- og sýslusaksóknurum og hafa yfirvöld í Brasilíu hann einnig til rannsóknar vegna fjársvikamáls.

Þá lögðu hlutlaus eftirlitssamtök fram kvörtun í vikunni til kosningayfirvalda og sökuðu þau Santos um brot á kosningalögum. Kvörtunin sneri meðal annars að um fjörutíu útgjaldaskráningum kosningasjóðs þingmannsins upp á 199,99 dali.

Samkvæmt kosningalögum vestanhafs þurfa kvittanir að fylgja öllum skráðum útgjöldum úr kosningasjóðum upp á tvö hundruð dali eða meira. Áðurnefnd samtök segja allt benda til þess að skráningarnar í bókhaldi þingmannsins séu ætlaðar til þess að fela í hvað peningarnir fóru raunverulega.

Árið 2020 sagðist Santos hafa haft 55 þúsund dali í tekjur. Í fyrra lánaði hann svo eigin kosningasjóði rúma sjö hundruð þúsund dali, sem er rétt minna en RedStone hafði safnað til að aðstoða Santos í kosningabaráttunni.

Annað félag tengt Santos hefur einnig vakið athygli en það kallast Rise NY og var stofnað af systur hans og fjármálastjóra framboðs hans. Það félags var skráð sem PAC og safnaði fúlgum fjár sem nota átti til kosningabaráttunnar.

Í frétt NYT segir hins vegar að yfirlit yfir fjármál Rise NY bendi til ýmissa undarlegra og jafnvel ólöglegra fjárútláta. Fjármunir voru meðal annars notaðir til að greiða laun starfsmanna framboðs Santos og reikninga.