Gjaldskrá Lyfjastofnunar hækkar um 10,6 prósent

Hækkunin nær bæði til lyfja fyrir menn og til lækningatækja.

Frá þessu er greint á vef Lyfjastofnunar.

Þar er fjallað um ákvörðun sem Lyfjastofnun tók 20. maí í fyrra um breytingu á smásöluálagningu lyfseðilsskyldra lyfja. Ákvörðunin var þríþætt og fól meðal annars í sér að verðþrepum og smásöluálagningu var breytt 1. júlí sama ár.

Þá var ákveðið að greiða sérstakt þjónustugjald til lyfjaverslana, 120 krónur, fyrir afgreiðslu ódýrasta lyfs og innan við 5 prósent frá ódýrasta verði í viðkomandi viðmiðunarflokki. Þessi ákvörðun tók gildi 1. janúar síðastliðinn.

Lyfjastofnun ákvað einnig að 1. mars 2023 myndi smásöluálagning ávísunarskyldra lyfja hækka sem samsvaraði verðlagsforsendum fjárlaga 2023. Það er á þeim forsendum sem heilbrigðisráðherra hefur ákveðið hina 10,6 prósent hækkun.

„Tilkynnt verður innan nokkurra vikna hvernig hækkun smásöluálagningarinnar mun dreifast á verðbil smásöluálagningar,“ segir á vef stofnunarinnar.