Ó­vissa varðandi leik­skólann Hlíð: „Erum í raun á hrak­hólum“

Málið bar brátt að. Foreldrar voru boðaðir á áríðandi foreldrafund þar sem þeim var tilkynnt að mygla hafi fundist í húsnæði leikskólans. Börnunum þyrfti að koma fyrir annars staðar og það með hraði. Meirihluti barnanna var sendur á Brákarborg í Sundum. Ein deild fór á Klambra en ein deild varð eftir á Litlu-Hlíð.

„Mikið álag og vesen fyrir foreldra, börn og starfsfólk“

Fríða Sigurðardóttir er í foreldrafélagi leikskólans. Í samtali við fréttastofu segir hún að foreldrum hafi upphaflega verið tilkynnt að ástandið myndi standa í sex vikur. Þá ætti starfsemin að geta hafist í Safamýrarskóla. Hún efast þó um að það taki svo stuttan tíma að leysa úr þessu.

„Við erum nefnilega að bíða eftir að Nóaborg fari úr Safamýraskóla. Það er verið að taka þeirra húsnæði í gegn líka eftir að þar fannst mygla. Þetta er orðið að einskonar halarófu sem býr til mikla óvissu,“ segir Fríða.

Fríða efast um að húsnæði Hlíðar muni opna aftur sem leikskóli. Þegar búið verði að taka það í gegn muni húsnæðið ekki standast nútímakröfur með tilliti til aðgengis og annars. 

Við förum ekki þangað í óbreyttri mynd, við erum í raun á hrakhólum. Það er mikið óvissuástand sem ríkir. Mikið álag og vesen fyrir foreldra, börn og starfsfólk.

Logandi hrædd um starfsfólkið

Þá segir Fríða foreldra hafa miklar áhyggjur af starfsfólkinu. 

„Það er auðvitað í ekkert sérstaklega vel launuðu starfi og fá ekki endilega þá virðingu sem þau eiga skilið. Margir starfsmenn nýta sér það að ganga til vinnu  en nú þurfa þau að eyða hálftíma í bíl hvora leið. Það vantar alls staðar fólk á leikskóla, af hverju ættu þau ekki að fá sér aðra vinnu innan hverfis? Við erum logandi hrædd um okkar góða starfsfólk,“ segir Fríða.

Foreldrar barnanna á Hlíð hafa tekið málin í sínar hendur og beitt sér fyrir því að finna húsnæði sem hentar, hvort sem það yrði bráðabirgða eða til frambúðar. 

„Við höfum mikinn skilning á því að Reykjavíkurborg sé í miklum bobba varðandi þessi mál. Þess vegna höfum við svolítið tekið til okkar ráða og reynt að aðstoða. Við höfum komið með tillögur og lausnir, reynt að vera með alla anga úti. Þetta er að okkar mati mikil skerðing á lífsgæðum að þurfa að fara út fyrir hverfið,“ segir Fríða.

„Við erum búin að senda bréf á alla kjörna fulltrúa, á borgarstjóra, á eignasvið, skóla-og frístundaráð. Í raun bara á alla sem hafa eitthvað með þessi mál að gera. Við fengum svar frá Degi [B. Eggertssyni, borgarstjóra Reykjavíkur] um að hann teldi málið vera í góðum höndum eignasviðs borgarinnar."

„Mögulega hægt að slaka á einhverjum kröfum tímabundið“

Í götunni Valshlíð er stórt húsnæði sem stendur autt þar sem ekki hefur tekist að leigja það út sem atvinnuhúsnæði. Foreldrafélagið stakk upp á að starfsemi leikskólans flyttist þangað um tíma. Því var neitað þar sem það þarf að fara yfir umferðargötu til að komast á útisvæðið. 

„Það stendur svo sem ekki svart á hvítu í neinni reglugerð að það megi ekki fara yfir götu,“ segir Fríða. Við viljum auðvitað ekki að það verði þannig til frambúðar að börn þurfti að fara yfir götu til að komast á leiksvæði, það er auðvitað ekki gott. En mögulega væri hægt að slaka á einhverjum kröfum tímabundið.“

Foreldrar bugaðir

Fríða segir foreldra almennt bugaða yfir ástandinu. 

„Það er svo mikil óvissa, fyrir foreldra, starfsfólk og ekki síst börnin. Við vitum ekert hvað verður. Þetta er hálftími í bíl hvora leið. Fyrir utan álagið á þessi hverfi sem eru að fá kannski hundrað auka bíla inn í hverfin sem voru ekki þar áður. Við viljum styðja grænar samgöngur sem eru tveir jafnfljótir. Viljum geta gengið með börnin í leikskólann og sótt þau gangandi,“ segir Fríða.