Óli Palli poppar Skagann upp

Þegar litið er yfir dagskrá kemur á daginn að um sannkallaða músíkveislu eru að ræða. Tónlistarmennirnir sem fram koma eru ekki af verri endanum.Vísir hringdi í Óla Palla og spurði einfaldlega hvað hann væri að gera?

„Þetta er mjög einfalt. Ef það er ekki gaman, þá er leiðinlegt og þá er ekki skemmtilegt. Þetta vita allir. Ég er bara að reyna að gera skemmtilegt í mínum litla heimabæ. Það er menningarhátíð á Akranesi þessa dagana sem heitir Vökudagar. Þetta er 20 ára gömul hátíð sem er alltaf að stækka; myndlistarsýningar og aðrir tónleikar. 

Þetta er innlegg í það, Akranesútgáfa af því sem við, ég og fleiri svo sem Kiddi kanína, höfum verið að gera í Hafnarfirði 2014. Sem hefur heppnaðast gríðarlega vel,“ segir Óli Palli. Hann vill leggja ríka áherslu á að hann sé einn skipuleggjenda, ekki að hann sé að standa fyrir þessu í einhverju egóflippi.

Ekki hallærislegt í neinum samanburði

Óli Palli er þekktur fyrir dagskrárgerð sína í útvarpi þar sem hann hefur áratugum saman fjallað um popp og rokk. Og þá er það þekkt að hann hefur sótt fjölda risa tónleikahátíða úti í hinum stóra heimi reglulega nú í mörg herrans ár. Verður þetta ekki alltaf eilítið hallærislegt í þeim samanburði?

„Nei, alls ekki,“ hlær Óli Palli. „Sko, ég sá á netinu um daginn að hljómsveitin Kiss, sem var uppáhalds hljómsveitin mín þegar ég var 12 ára, að hún var að spila í einhverju svona prívatpartíi fyrir eitthvað fyrirtæki. Hundrað manns. Og það hlýtur að hafa verið geggjað.“

Óli Palli segir uppleggið vera tónleika fyrir fáa, í litlu rými, og það séu tónleikar sem bragð er að fyrir þá sem sjá.

Þetta er bara svona. Páll Óskar sagði allt fyrir ástina, við segjum allt fyrir nándina. Þetta eru nándartónleikar. Ég fór á Airwaves í gær og það geggjað. Þar sá ég þrjú af atriðunum sem verða á HEIMAskagahátíðinni á morgun: Júníus Meyvant, Listasafnið og troðfullt, hann verður að spila í stofu hér nálægt heimili mínu. Ég sá líka Vintage Caravan sem var að spila tónleika númer 80 í röð og svo spila þeir í stofu neðar í götunni og í Blikksmiðju Guðmundar (það spila allir tvisvar) og svo var Una Torfa, frábær músíkant, í Iðnó. Troðfullt.“

Frábærir tónlistarmenn í návígi

Óli Palli segir að þeir sem mæta á hátíðina eigi þess kost að sjá frábæra tónlistarmenn í návígi.

„Hörður Torfa er spenntur en hann hefur ekki spilað í sjö ár, LayLow ætlar að spila á rakarastofu Hinna, sem er eitt minnsta hús á Akranesi. Og þannig má áfram telja. Við erum búin að vera allt árið að hugsa hvaða listamenn við viljum helst fá. Og erum afar stolt af því hverjir munu spila.“

Óli Palli segir svo frá að sjálfur Herbert hafi mætt í gær til að stilla upp en hann er mikill fagmaður og leggur uppúr því að „sound-ið“ sé eins og best verður á kosið. Aðrir listamenn sem ekki hafa verið nefndir eru Guðrún Gunnars, Tíbrá, Djäss og Guðrún Árný.