Dómar í salt­dreifara­málinu þyngstu dómar sem fallið hafa í fík­niefna­máli

Fimm voru ákærðir og sakfelldir í málinu en um er að ræða eitt stærsta fíkniefnamál sem hefur komið upp hér á landi.

Málið varðar annars vegar innflutning mikils magns amfetamínbasa og hins vegar umfangsmikla kannabsiræktun á sveitabænum Hjallanesi við Hellu.

Málinu hefur verið lýst af lögreglu sem einu stærsta fíkniefnamáli sögunnar en lagt var hald á gífurlegt magn fíkniefna og var götuvirði efnanna talið nema 1,7 milljarði króna.

Ráðgera að áfrýja á næstu dögum

Halldór Margeir Ólafsson og Ólafur Ágúst Hraundal hlutu báðir tólf ára dóm fyrir aðild þeirra að málinu, sem er þyngsti mögulegi dómur fyrir fíkniefnalagabrot. Guðlaugur Arnar Guðmundsson og Guðjón Sigurðsson hlutu tíu ára fangelsisdóm en Geir Elí Bjarnason hlaut tveggja ára dóm fyrir hans aðild.

„Varðandi þátt umbjóðanda míns liggja ekki fyrir nein fíkniefni, það er að segja, það eru bara hugmyndir að það hafi verið framleidd svo og svo mörg kíló af fíkniefnum úr svo og svo mörgum lítrum af amfetamínbasa. En þetta eru mjög þungir dómar, mjög þungir dómar,“ segir Sigurður G. Guðjónsson, verjandi Guðlaugs Agnars. 

Verður áfrýjað? 

„Já alveg örugglega, alveg örugglega,“ segir Sigurður og bætir við að líklega verði það gert á allra næstu dögum. 

Dómur í takt við kröfur ákæruvaldsins

Ákæruvaldið studdist mikið við dulkóðuð gögn sem bárust lögregluyfirvöldum hér á landi frá Europol árið 2020. Í gögnunum mátti rekja samskipti Íslendinga á samskiptaforritinu Encrochat, sem fréttastofa hefur fjallað ítarlega um. Sigurður segir ekkert haldbært hafa legið fyrir sem tengdi Guðlaug við notandann í Enchrochat, sem ákæruvaldið segir hann hafa verið á bak við, og því sé sakfelling yfir honum byggð á sandi. 

„Ég er bara mjög vonsvikinn með þessa niðurstöðu fyrir skjólstæðing minn. Ég taldi að það væru ekki komin fram þau sönnunargögn sem gætu leitt til sakfellingar hans og ég er enn þeirrar skoðunar,“ segir Sigurður. 

Býstu við annarri niðurstöðu í Landsrétti?

„Ég er að vona það já, ég er að vona að mér takist að sannfæra Landsrétt um það að sönnunarreglur sakamálaréttarfars séu þannig að það verði að vera hafið yfir skynsamlegan vafa að menn séu dæmdir í fangelsi.“

Saksóknari sagði í samtali við fréttastofu að dómurinn hafi verið í takt við kröfur ákæruvaldsins, enda um mikið magn efna að ræða. Aðrir verjendur vildu ekki veita fréttastofu viðtal í dag.